لاأحلل الدخول ابد غير تقوى

[ياحسيــن]

السلام عليكم ورحمة الله وبركاته
اللهم صلي على محمد وال محمد
كيف حالك اختي العزيزه ^_^
اتمنى مساعدتي وسامحيني لاني راح اثقل عليك واغثك شوي بمشاكلي
وانا كتبت لااحلل الدخول غير تقوى لاني من النوع الي ماحب ابين ضعفي قدام احد
ولان خواتي واهلي كلهم بالمنتدى واكيد راح يعرفوني
بسم الله

الجنس \ أنثى

العمر\22

الحالة الأجتماعية\عازبه

المستوى التعليمي \ثانوي

الوضع العملي \عاطله بالبيت بس
مشكلتي قصدي مشاكلي !!!
اني اعاني حييييييييييييل بشكل كبير جداااااااااااا من الوحده
حيل احس بالوحده
بالبيت اختي ماتسولف معاي الا نادر واحنا من النوع الي داايم هواش عشان كذا السكوت افضل ودايم ساكتين وانا بعد دايم ساكته لاني صايره حيييييل عصبيه فأفضل السكوت
ماعندي صديقاااااات اببددددددد
ساامحيني طولت عليك بس والله الحياه لاااااااااااااااتطاااااااق
واتمنى تساعديني وتتحمليني (F)

[.:تقوى:.]

وعليكم السلام والرحمة
اهلا بك عزيزتي ياحسين ، شكرا لطرح مشكلتك وثقتك بنا
انا بخير والحمد لله ، كيف حالك أنتي ؟ اتمنى تكوني بأحسن حال ..


عزيزتي اعذرين سأرد عليكِ على عجاله ، وإن شاء الله في اقرب وقت

ارد عليكِ بشكل وافي ..

- ماهي هواياتك وطموحاتك ؟

- كيف تقضين يومك من الصباح الى المساء ؟

- هل بحثتي عن عمل ؟ وهل لكِ رغبة بالعمل ؟

-اذكري صفاتك الايجابية والسلبية ؟

- ماهي أكبر مشكلة تواجهينها بحياتك؟

اهتمي بنفسك عزيزتي وكوني بخير
حفظكِ الله

[ياحسيــن]

بسم الله الرحمن الرحيم
السلام عليكم والرحمه
اللهم صلي على محمد وال محمد وعجل فرجهم
معقوله كل هالمشاهدات وانا كاتبه لااحلل الدخول !!!يعني عادي؟؟؟شي جدااا غريب
معليش بس ماحب حد يشوفني او يسمعني وانا افضفض ابددد ماحب
ممكن عزيزتي تمسحين كل كلامي من بعد كلمة(ماعندي صديقات ابددد)بعده الباقي كله مسحيه اررررجووووووووك اررجوك
اذا ممكن لاني تضايقت جدا لما شفت المشاهدات صراحه
والله يعطيك العافيه يااارب

بسم الله
- ماهي هواياتك وطموحاتك ؟
كنت اطمح اصير ممرضه بس طبعا ممنوووع منعا باتا في عايلتنا
وتمنيت ادرس بالجامعه كان حلمي اتخرج وادرس بالجامعه بس صار لي 4سنوات من تخرجت ولاقبلوني ابد والحين بعد سجلت هذه السنه والله كريم يقبلوني...دعواتكم لي
هواياتي\احب نقش الحنا بس ماعرف ومالي خلق اسوي شي ابددد...المراسله..التعارف...الخط .. الاعمال الفنيه ..مشكلتي مالي خلق اسوي شي ابد بس قاعده ماشتهي حتى اتحرك

- كيف تقضين يومك من الصباح الى المساء ؟
انام الساعه7الصبح واصحى 4 العصر اجلس على اللابتوب الى 7 ولااشتهي اكل شي بس اقووم اشوف اي شي يعطيني طاقه ..واصلي المغرب واسوي اعمال
وبعدها اجلس على اللابتوب واقوم اشوف اهلي وارجع للابتوب واقوم خمس دقايق وارجع يعني كل فتره اطفش واقوم ماالاقي شي اسويه وارجع للنت
وبعدين يمكن12 بالليل نطلع مع ابوي نتمشى بالسياره وسوالفه كلها عن مشاكله وتجيب الهم مع اني ماحب اروح معاهم ابد بس ماابي اجلس بالبيت
ونرجع 1واجلس عالنت الى الفجر
-لاحضت شي اني مهما اروح المريخ...سطح القمر بعد مهمومه وحزينه ومافي شي عاجبني

- هل بحثتي عن عمل ؟ وهل لكِ رغبة بالعمل ؟
اي فكرت بالعمل بعد مافقدت الامل بالدراسه بس مافيه اي عمل يناسبني ولالقيت اي شي اصلا

-اذكري صفاتك الايجابية والسلبية ؟
صفاتي الايجابيه\هاديه-احب اساعد الي محتاج لمساعده-احب السوالف والضحك
السلبيه\عصبيه ثم عصبيه ثم عصبيه -حزينه بشكل -مالي خلق اتكلم ولااتحرك-اكره طولي حييييييييل-كثيرة امراض-كثيرة الدموع

- ماهي أكبر مشكلة تواجهينها بحياتك؟
كلي مشاكل
-الوحده
- كثيرة امراض
-طولي
-الفراااااغ
-الفراغ العاطفي

سامحيني بكثر عليك واخذ من وقتك
مشكوره والله يرزقك ويعطيك من حيث لاتحتسبين يااارب

[.:تقوى:.]

وعليكم السلام والرحمة

كيف حالك عزيزتي ؟ اتمنى تكون ايامك سعيده دووم..

عزيزتي انتي عارفه ان القسم عام ، واصلا العنوان يجذب الناس

ويصير عندهم فضول ، ليش البنت تحلف ماتبغي احد يدخل موضوعها !!

مسحت جزء من الموضوع بناء على طلبك ..

شي ثاني ابغي توضحينه لي : ليش ماتبغين احد يشوف موضوعك ؟

مع ان مشكلتك مثل الكثير من البنات بسنك !

فهل هذا الشي يسبب لك الاحراج ؟ أو يشعرك بالنقص ؟

..

لاحضت شي اني مهما اروح المريخ...سطح القمر بعد مهمومه وحزينه ومافي شي عاجبني

ههههه عجبني تعبيرك ..

تدرين ليش الحزن ملازمك ومافي شي يرضيكِ ؟

لأنك وضعتي نفسك في صندوق { كلي مشاكل ، حزينه بشكل ، الحياة تعيسه .... }

أين التفاؤل بحياتك عزيزتي ؟؟ أين التوكل على الله سبحانه وتعالى ؟؟
أين الحمد على ما اعطاكِ اياه سبحانه وتعالى ؟؟

عزيزتي يقول سبحانه وتعالى ( ولأن شكرتم لأزيدنكم )
اشكري الله سبحانه وتعالى على نعمة ليزيدك خير ..
على نعمة الصحه ، العقل ، المأوى ، الجمال ، المال ، الهداية ،الأمن ، الغنى ، الستر ..

استمتعي بالحياة ..

لما تطلعوا مع الوالد الله يحفظه بالسيارة ، راقبي السماء والنجوم ( هذا شي جميل ولا لاء؟؟)

لما تكونوا مع الوالد الله يحفظه ويسوالف معكم حتى لو كان يفضفض هذا يعني انه يتواصل معكم ومافي حاجز بينه وبينكم
( هذا شي جميل ولا لاء؟؟)

لما تطلعي بليل مع الوالد الله يحفظه كل يوم تغيري جو( هذا شي جميل ولا لاء؟؟)

جربي لما تطلعون هذي المره ان تطلبين من كل واحد يقول نكته وخبريني كيف الجو يكون

..

ابغي منك كل يوم قبل النوم ولما تصحي من النوم (( ابتسمي ))

وقولي هذا" اليوم حلو" بصوت مسموع 10مرات كرري الجمله .. وخبرين كيف شعورك بعدها

وبما ناك تحبين نقش الحنا ، ابغي منك تخصصي لك دفتر ترسم فيه كفوف وزخرفيها وكأنك تنقشين حنه

ممكن تدورين بالنت عن دروس لنقش الحنه ، واغي اشوف ابدااااااااعك ( وما ابغي اعذار ابغي تطبيق فورا)

اذكري صفاتك الايجابية والسلبية ؟
صفاتي الايجابيه\هاديه-احب اساعد الي محتاج لمساعده-احب السوالف والضحك
السلبيه\عصبيه ثم عصبيه ثم عصبيه -حزينه بشكل -مالي خلق اتكلم ولااتحرك-اكره طولي حييييييييل-كثيرة امراض-كثيرة الدموع

ماعجبني الرد عزيزتي !!

ابغي تذكر 10 صفات ايجابية في شخصيتك مميزة مختلفة عن الآخرين


بخدمتك عزيزتي

اما المشاكل راح اخصص لها رد في وقت لاحق

اهتمي بنفسك كوني بخير
حفظكِ الله [/align]

[ياحسيــن]

السلام عليكم والرحمه
اللهم صلي على محمد وال محمد وعجل فرجهم
اللي دخل موضوعي مراااح احلللللللللللللللهم ابددد
وكأني كاتبه الرجاء الدخول!!
مشكوووره لانك مسحتيه تسلم ايدك والله يعطيك العافيه يارب ريحتيني^_^
بسم الله


شي ثاني ابغي توضحينه لي : ليش ماتبغين احد يشوف موضوعك ؟

مع ان مشكلتك مثل الكثير من البنات بسنك !

فهل هذا الشي يسبب لك الاحراج ؟ أو يشعرك بالنقص ؟
اكيييد يسبب لي احراج انا من النوع الي مااشكي لاحد ابد وماحد الكل يشوف هالكلام وانا بصراحه مش ماخذه راحتي
بالكلام ابدددد جالسه اختصر قد مااقدر

ولما اطلع مع ابوي
اعووذ بالله من نركب الى ننزل من السياره وسوالفه عن الزنا والخيانه والشك والعنوسه والطلاق والديون غيررهم مااااااافيه ابد
من اول مانخلقنا وهو هذه سوالفه وساعة هم اذا قال نبي نطلع عشان يسرد لنا من تطلقت ومن تزوجت ومن خانة زوجها
ومين ومين ومين...

لما صحيت قلتها عشر مرات حسيت مممم بشوية تفاءل وانا ادعي في قلبي يارب يكون احلى

واوعدك راح احاول ارسم حنى ^_^

بالنسبه للصفات الايجابيه مااعرفت مالقيت طول اليوم وانا افكررر مالقيت غير الي كتبتهم

اتمنى لك كل السعاده والله يحشركم مع محمد وال محمد يارب

[.:تقوى:.]

وعليكم السلام والرحمة

كيف حالك عزيزتي ؟ اتمنى تكون ايامك كلها افراح وسرور..

مبارك عليكم هذا اليوم السعيد


اضحكني الكلام بداية ردك الأخير (^_^)هدي نفسك لا تعصبين

راح تعجزين وانتي بعدك صغيرة ..

عارفه عزيزتي الطفل الصغير لما نلعب وياه ونشاغبه حتى يعصب شلون شكله يصير ؟



حتى وهو معصب وزعلان حلو .. وانتي روحك حلوه مثل الطفل

لما تزعلي أو تعصبي تكوني مثل الطفل حلو حتى وهو معصب ..فيتعمد اهل مشاغبتك لروحك الحلوه مثل الطفل

عن جد انا نفسي حسيت بهذا الشي لما عصبتي ليش الاعضاء يقرون موضوعك هههه ..(لايكون تزعلي مني ؟؟)


عزيزتي خذي الأمور بمزح وضحك ، فلما اهلك يتعمدون مشاغبتك أنتي شاغبيهم واضحكي معهم

وبكره لما تتزوجي إن شاء الله حتى الزوج يحب المرح والضحك واذا بتزعلي لكل شي را يضايقه وماراح يكرر يمزح او يضحك معك

وبتصير حياتكم جد بجد (ممله )بلا طعم ..

س : تعرفي تسوين مقالب ؟؟ اذا تعرفين ابغي تسوين مقالب مع اخوانك وخواتك ..


اما بالنسبة لسوالف الوالد ..

عزيزتي هذا يعتمد مع من يجلس الوالد وطبيعة سوالفهم ..

طيب اذا انتي مليتي ويضايقك ، انتي غيري الموضوع الى موضوع حلو ومسلي للجميع

ومثل ماقلت لك سابقاً اطلبي من كل واحد يقول نكته أو لغز >> راح تتحول الطلعه الى طلعه مسليه وممتعه


بالنسبة للصفات الايجابية بساعدك ببعض الصفات .. اختاري الصفة التي تنطبق عليكِ ..

محبوبة -نشيطة -مرحه -اجتماعية-منظمة-مثقفة-انيقة-ذكية-موهوبه-مسالمه-متفائله-مثابرة-متأنية-جميلة-مميزة-بشوشة-حلوة المعشر-طموحه ..


بالنسبة لمشكلة الطول ..

البعض يكون قصار القامة ولكن من خلال شكلهم نقدر نعرف عمرهم التقريبي

والبعض الآخر قصار القامة مع اشكالهم توحي بأنهم اصغر سناً

فأي نوع انتي ؟

ممكن حل مشكلة قصر القامة بالأحذية ذاك الكعب العالي ..بالأضافة الى ان الكعب يعطي جمال بقامة المرأة ويميزها عن الرجل

بالمشي والوقوف ..


شكرا لدعائك عزيزتي ولك بالمثل

اخبريني بما يستجد معك عزيزتي
وكوني بخير
حفظكِ الله

[ياحسيــن]

هلا وغلا حبيبتي
من قال لك للحين ماعجزت
انا مت اصلا بس للحين اتنفس>حشى جنيه ههه
ابوي ذا قصته قصه ماعلينا من هالسالفه الحين
والصفات امممممممم
اجتماعية-منظمة-مثقفة-انيقة-ذكية-موهوبه-مسالمه-جميلة-حلوة المعشر-طموحه ..
بس شالفايده منها ماتنفعني هالصفات ولاابيها اصلا وفيني ولامافيني مافرقت
وانا من النوع الثاني ولااقدر البس كعب يعور ظهري
اليوم جات عجوز خالتي تقول لي كم عمرك قالت امي 19!!!!
قالت بس شفيها وينها تاكلون منها هههه وخذته على انه مزح
هو شي يضحك بس بعد يجرح وحيل

[.:تقوى:.]

هلا عزيزتي ..

كيف حالك ؟ للحين عجوز هههه

على ذكر الصفات .. ما الصفات التي تتمنينها في شريك حياتك مستقبلا؟

من ناحية الشكل والاخلاق والتعامل ....


القاك على خير بإذن الله تعالى

[ياحسيــن]

السلام عليكم والرحمه
اللهم صلي على محمد وال محمد وعجل فرجهم
للحين لبكره
ههههه احرجتيني بالسؤال
مادري اهو بصراحه >>قامت تتدلع
لا جد
اممممممم ابيه يكون طوووويل اهمممممممممم شي ويكون سليم من كل الامراض ويكون اسمراني ووسيم
ومايكون فقير حيل يجيب لي الهم >>تتشرط بعد هو حاصل لك ههههه
ويكون يكره كل بنات الدنيا الا انا>>كثري منها
ويكون هادي وذكي وملتزم ويحب الطلعه والسفر >>احلام ورديه

وبس :$

[.:تقوى:.]

وعليكم السلام والرحمة

كيف حالك اليوم ؟ اتمنى تكوني بأحسن حال ..

عزيزتي لاتقولين عن نفسك عجوز انا كنت امزح بس ،و احب اللي يقدر ذاته

بالنسبة لصفات شريك الحياة هذا امر عادي كل بنت اكيد حاطه ببالها مواصفات معينه لشريك حياتها

فلا تستحي .. ( :

-طيب عزيزتي شلون بتعرفي ان المتقدم عنده كل هذي الصفات ؟؟

-وشي ثاني تتوقعي شنو بباله من مواصفات لشريكة حياته ؟
( الشباب بشكل عام شنو تتوقعي يتمنون من صفات بشريكة حياتهم المستقبليه)

اهتمي بنفسك وكوني بخير
حفظك الله

[ياحسيــن]

-طيب عزيزتي شلون بتعرفي ان المتقدم عنده كل هذي الصفات ؟؟
اكيد راح اعرف من اول جلسه معاه
بسأل فيه لين اعرف كل شي

-وشي ثاني تتوقعي شنو بباله من مواصفات لشريكة حياته ؟
ماادري والله!!بس اكيد مراح ياخذني الا بعد مايعرف مواصفاتي وتعجبه

( الشباب بشكل عام شنو تتوقعي يتمنون من صفات بشريكة حياتهم المستقبليه)
الشباب
امممممم بالنسبه للسعوديين يعني\الجمال ثم الجمال ثم الجمال ثم الجمال
عاد الاخلاق ذا اخر شي يفكرون فيه

هذا اللي اشوفه بمجتمعنا (الحساوي)

وبس

[.:تقوى:.]

اللهم صلّ على محمد وآل محمد وعجل فرجهم

كيف حالك عزيزتي ياحسين ؟ اتمنى تكوني بأحسن حال ..
-طيب عزيزتي شلون بتعرفي ان المتقدم عنده كل هذي الصفات ؟؟
اكيد راح اعرف من اول جلسه معاه
بسأل فيه لين اعرف كل شي

ماتقدرين تعرفين كل شي من اول جلسه لأن راح يحاول يظهر نفسه انه انسان فيه كل الصفات الايجابية

والجيدة اللي تتمناها كل بنت ، فكيف بتعرفين الصفات السلبية اللي فيه ؟؟
وشي ثاني تتوقعي شنو بباله من مواصفات لشريكة حياته ؟
ماادري والله!!بس اكيد مراح ياخذني الا بعد مايعرف مواصفاتي وتعجبه

صحيح ، لكن اذا انتي من بداية الموضوع ماتشوفين ان فيكِ صفات ايجابية

وبعدها قلتي مو مهم تكون فيني (صفات ايجابية واصلا ماراح استفيد منها بشي )

بهذي الحاله الخاطب كيف راح يعجب فيك ؟؟؟؟
امممممم بالنسبه للسعوديين يعني\الجمال ثم الجمال ثم الجمال ثم الجمال
عاد الاخلاق ذا اخر شي يفكرون فيه

إن الله جميل يحب الجمال ، واحنا نهتم وننتبه للشيء الجميل فعلا

لكن هل كل انسان نرتاح له ؟

اهم شروط القبول هي الارتياح النفسي والارتياح النفسي مايتحقق للشكل الانسان او طوله

او لونه .. الارتياح النفسي يتحقق لخُلق الانسان ، لشخصيته ..

...

عزيزتي متى تكوني راضية عن نفسك يرضى عنك الناس ومتى لاتكوني راضية عن نفسك لايرضى الناس عنك

انتي تجذبين الناس حولك بشخصيتك اللطيفه ، بأخلاقك ، بأبتسامتك ، بحبك لمن حولك ..

لا الشكل ولا الطول هما اللي يجذبو الناس لك عزيزتي ..

سؤال : متى تكوني راضية عن نفسك ؟

..


وماذا عن التمرين ؟ هل مازلتي تطبقينه (تكرار العبارة ؟)

اهتمي بنفسك وكوني بخير
حفظكِ الله