السلام عليكم ورحمة الله وبركاته
اللهم صل على محمد وال محمد الطيبين الطاهرين وعجل فرجهم
1/شيخي الكريم تحية طيبه مع خالص امتناني وشكري على هذا المنتدى وعلى جهودكم المأجوره انشاء الله
اتمنى مساعدتنا لحل مشكله تتعلق بأخي , عمره 27 سنه
مو متزوج ومايعاني من امراض او كوابيس او الام في الأكتاف اوالمفاصل او غيرها , ماعنده علاج في المنتدى
وما اخدت اذنه في الكشف لأنه مستحيل ...
للأسف ياشيخ اخوي شخص منحرف بكل معنى الكلمه , كنا قبل نعرف ان له في المشاكل , لكن مو مثل الي اكتشفناه في الفتره الأخيرة , يشتغل من 3 سنوات ويصرف راتبه على الحرام وشلة السوء , واصحابه يحركوه مثل مايبغو ويتحكمو في راتبه ويصرف عليهم ويطلب فلوس من اهلي عشانهم وعلشان الحرام الي يشاركهم فيه .
قبل سنتين قال اخطبو لي وقلنا انتظر اخوك لما يجي بعد ما يخلص دراسه من الخارج يقدر يخطب لك لأن ابونا مو على وفاق معانا وراح يعاند في هالخطبه مثل ماعاند في كل زواجات البيت وقلبها مشاكل واحزان , فقلنا انتظر اخوك لما يرجع من دراسته يروح يخطب معاك اذا ابوك مارضى يروح ,,,
لكن للأسف لما رجع اخوه عرفنا بالصدف المتواليه انه ماخلا حرام الا وسواه وماراح اقول نوعية الأفعال المشينه حفاظاً على الحياء , لكن أي شي حرام تتصوره هو سواه من سرقه الى علاقات الحرام , والأهل انقسمو في رأيهم منهم من يقول زوجوه بأسرع وقت عشان يتباعد عن شلة السوء والحرام الي مسيطرين على تفكيره , ومنهم من يقول لا تزوجوه الا اذا اعتدل سلوكه حتى لو اتقدم به العمر لكن قلنا بنخطب له ونشوف ,,, وبالفعل صار لنا فتره نخطب له وكل مرفوض وهو ساعات يوافق على الخطبه ويحزن ادا انرفض ونقول صار يحس انه مرفوض بسبب افعاله ان شاء الله الله يهديه ,,وساعات يقلب علينا بمجرد ما نقول له بطل مشي مع هالمشبوهين يخرب الدنيا ومايخلي كلمه قبيحه الا ويقولها لينا ولأمه المسكينه ويقول خلاص لاتخطبو لي , وامي مسكينه تتعب وتمرض من وراه ,,
نتزاعل معاه كم يوم وبعدها نمشي معاه بالصبر والمسايسه وحاطين ملح على الجرح على امل ان الله يهديه الجديد في الموضوع ان احنا شفنا له بنت تدرس برى البلد واهلها من كلامهم انهم موافقين عليه وبياخدوه على علاته بسبب ظروفهم الصعبه ولأن البنات عندهم كثيرين وبدون زواج لكن يبغوه يسافر مع بنتهم هي تدرس وهو يدير باله عليها لقيناها فرصه انه يبتعد عن اصحاب السوء , ويمكن يكمل دراسه , وافق في البدايه وصار عنده نوع من الحماس , لكن يوم ثاني اتفاجئنا انه جاي ويقول احتاج فلوسي الي جمعتها للمهر بشتري سياره جديده وزواج ما ابغى , ماوراه الا جهال وازعاج وتعب فأحنا شكينا انه راح قال لأصحابه وطبعا هم رفضو وشوشوه على الزواج وكرهوه فيه وبالعكس طالبوه يجيب فلوس المهر عشان يصرفها عليهم وعلى الحرام والسفر ,,
الحين ياشيخ احنا في وضع لا نحسد عليه ونفسيتنا تعبانه جدا خصوصا امي الله يعينها عليه ,,انام ونصحى على الهم والتفكير حتى اولادنا وازواجنا مو عارفين نبتسم في وجهم , خايفين نتركه من غير زواج ويزيد في مشاكله ويوصل لا قدر الله للسجن او القتل او الله اعلم ...وخايفين انزوجه ونظلم بنت الناس خصوصاً انه متعود على مساعدة الأهل الماديه اله دائما بالرغم من انه يشتغل وعنده راتب وطبعا قللنا هالمساعدات الحين بعد ما اكتشفنا وين يوديها لكن دائما نقول له اخطب وراح نساعدك مادياً فأحنا خايفين انه يتزوج وما يتحمل المسؤليه ويطالبنا ان نصرف على زوجته واولاده وراتبه رايح على اصحابه يمكن انكون مبالغين في تصورنا وخوفنا ويمكن لأ يمكن الله يهديه لما يشوف الزوجه والاولاد , لأن واجد شباب الله يهديهم لما يتزوجو ,,
فأحنا طالبين منك جزاك الله كل خير وثواب تساعدنا في حل هالموضوع نزوجه ولا نأخر زواجه او شنسوي بالضبط؟؟
2/وطلب ثاني يمكن يكون غير ملائم السؤال عنه لكن اذا أمكن فهو جيد تنصحنا نخطب له من هالبيت الي هم موافقين عليه لأن بصراحه كل مانسأل عنهم ما حد عارفنهم وصارو يتصلو علينا ويقولو متى بتجو تخطبو
3/وشي اخير واسفه جدا على الأطاله
واحد من اصحابه هو الأقرب اله وهو الأفسد مابينهم واكثر واحد يتحكم فيه واكثر واحد مستفيد من راتبه اهلي يقولو بيروحو بيتهم وبتتفاهمو مع اهله بالعقل , لكن خايفين لأن سمعنا انهم عصبيين وماعندهم تفاهم , وخايفين ان اخونا يدري ويخرب الدنيا ونكون بدل مانكحلها نعميها ,,
وساعات نقول يمكن هذا جزء من الحل ويضبطو ولدهم خصوصا انه صغير عمره 18 سنه والله احنا مستغربين من هالأخو عمره 27 يتحكم فيه واحد عمره 18 هذا ان دل على شي فهو يدل على قلت عقله وفساد اخلاقه , لكن نقول يمكن هدا جزء من الحل فتنصحنا ان نروح نكلم اهله هالشي يساهم في حل المشكله او ما تنصحنا؟؟
وفي الأخير اني اسفه جداً جداً على الأطاله ,وارجوك تسامحني والله يجعله في ميزان اعمالك , وفرج ان شاء الله لأهل البحرين والقطيف , ولصاحب العصر والزمان عجل الله فرجه الشريف
تقبل شكري وامتناني
اللهم صلي على محمد وال محمد الطيبين الطاهرين
اختي الكريمة الروضة غير مخصصة للكشف وانما للعلاج فقط وكما إن دفع العلاج يتطلب موافقة الشخص نفسه حتى يقوم هو بالاعمال. اذا هو غير موافق على اداء العلاج وانتم تريدون بعمل اعمال له بأمكانكم الاغتراف من باقي الروضات العلاجية ما يناسبكم من علاجات والدعاء له بالهداية والاصلاح. انصحكم بطرح المشكلة على الاستشارية تقوى في روضــة الإســتـشــارات النـفـسـيـة والأســريــة. اعانكم الله/ زمـرد