مشكلتي عدم التفاهم مع زوجي

[ننخاك ياأم البنين]

السلام عليكم ورحمة الله وبركاته

الاستمارة الشخصية

الجنس :أنثى
العمر : 22 سنة
الحالة الاجتماعية: متزوجة
المستوى التعليمي: جامعه
الحالة:ادرس

المشكلة بالتفصيل

أخت تقوى انا اعاني من مشااااكل مع زوجي
انا راح اتكلم لك بعطيك نبذة عنه
زوجي اكبر مني ب16 سنة انا مايهمني العمر ابدا اهم شي الاخلااااااق والتفاهم والاحترام
زوجي قبل لاياخدني كان مصاب
كان طايح بالحمام وتاثر كثير منها
صار عنده فقرة انزاحت يعني مايقدر يقوم عدل ولايقعد وصار عنده ضعف برجايله
فصارت حركته جداااا ضعيفة ومشيته صعبه ومايقدر يمشي واجد او حتى يحمل حاجه حده دخانه وبوكه اشياء ثانية فيها ثقل يخاف منها ..
انا مشكلتي مش هادي .

مشكلتي انا مع زوجي ماااايفهمني ابدا انا انسانة متفاهمة وقبل لا اتزوج كنت  اجتماعية ومتفاهمة مع الكل
اهلي وصاحباتي ولي كلمة مسموعة ومااسوي مشاكل مع احد ..
بس من تزوجت صرت عصبية وانطوائية ع قولة رجلي لأن صرت مااروح لأهله لأن اهله مش من النوع الي يهذر هم كذا هادئين وطبعا صارت مشاكل ويا زوجي لان يبغاني اقعد اياهم ..
وزوجي من النوع العصبي ومامرة تفاهم زي الناس ..حياتي كلها هواش على أقل حاجه ..
طبعا بداية زواجي اكتشفت ان زوجي يكلم وحدة بس هي متزوجة وعندها بنت صغيرة ..كان كلامه اياها احس بس ضحك يعني مافي لقاءات ومكالمات بس ع الفيس ..
انا طبعا اكتشفته وصحت صحت ليييييين ماانهرت وصرت مااوثق فيه وكل مرة افتش بجواله من ينام .. وكان يطالع افلام اباحيه
وكذا مرة اصيده ونتهاوش  ..
طبعا من ذيك المرة حلف لي وتعهد بالقراءن مايسوي هالأشياء ..

بس انا صرت دايم اشك فيه وتوترت حياتي الزوجيه صرت مااثق فيه ونا للحين افتش بس مومثل قبل اخف بواجد حق اطمن بس ...
المشكلة الاساسية اني احس روحي قاعده بسجن مااحس نفسي ابداااا متزوجة وقسم بالله انصدم من اقرى اسمي بكرت العائلة اني متزوجة وعندي ولد ..
لأن مااحس نفسي عايشة نفس المتزوجات لاطلعه لاراحة لا وناسة

ادا بطلع دايم السوبر ماركت او اقضي ثياب اووو اي حاجه لحالي وناا ماابي اخد احد معاي لأن ماابي احد يعايرني حتى لو اهلي ..
حتى ادا بروح مواليد يتهاوش اياي ..
ولما اركب السيارة يسودنا الصمت مافي بينا سوالف الا قليييييييييييييل جدا وطبعا لازم هوشة فيها .
انا من اصير مستانسة ونسى هم الدنيا لازم زوجي يعكر علي بصرخه او هوشه على اقل شي ..
حتى المزح مااحب امزح وياه ..
وذا قعدنا بالصالة مافي سوالف كل واحد لاهي بجواله ..وساعات اذا كنا نطالع مسلسل ونا اعلق على المسلسل هو مايهتم كله بجواله ..
انا والله احس نفسي موانسانة قسم بالله
وتوني اليوم تهاوشت اياه عشان ابي اروح رحلة الى المدينة بغير جو طبعا مع ناس تبع حسينية
قال لي قولي الى خواتي (يقصد اهله)انش بتسافر عشان بتقري وبخلي ولدي عندكم ..
طبعا انا رفضت اني اكذب .لأن مورايحة اقرى رايحة رحله ابي اغير الجو الكئيب الي عايشتنه معاه ..وطبعا تهاوشنا وقالي مافي سفرة وذا موعاجبتنش العيشة بوديش لأهلش ..
 
انا مامرة اشتكيت لأحد حتى زوجي مااحب اشتكي له .. لأن مايفهمني ..ادا سمعني اليوم الثاني يقلب علي ..
فصرت اخش بقلبي كلما صارت مشكله مااقول لاحد وقعد بالغرفة اصيييح اصيييح عشان تروح الغبنة مني ..
وكلما اتذكر الخطاطيب الي جو لي قبله اتحسسسسسف وربي اندم اني وافقت عليه ..
لأن مافي شي يستحق اوافق عليه
لاجمال ..رغم ان الجمال مايهمني
لااخلاق
لاتفاهم
ويصارخ علي وكله مشاكل
احس نفسي ضايعه قسم بالله شسوي ..
طبعا انا شقتي اساسا تصميمها غلط بغلط ..
والله احسها سجن وربي
مافيها شمس بالذات الصالة صايرة مثل المسجونة فيها
احس الطاقات السلبية كلها فيها ..مااتفرق معاي صبح ليل الا اذا شفت الوقت ..
رغم اني كلمته ابي اغير الشقه او انه نعيش في اجار لان قسم بالله مو مستحملة المكان مااااطيقه
صار لي سنتين وللحين ماأتقلمت فيها ..

انا عندي سؤال تقوى
هل انا امكبرة المشكله
هل انا مااستحق اسافر لان ابي اغير جو نفسيتي مدمرة ؟؟
اتمنى تساعديني ترى افكاري مشتته وربي ضايعه ضايعه مافي شي اعيش لأجله احس ..
ونا بداخلي اشيااااااااء كثييييييرة وبي اطلعه
ونتي الوحيدة بس الي بقولها لش لأن حسيت انتي الانسانة الي بتفهميني وتساعديني
 
 
 
 

[.:تقوى:.]

السلام عليكم ورحمة الله وبركاته
اهلا بكِ اختي الكريمة ن شكرا لطرح مشكلتك ولثقتك بنا
كيف حالك ؟ اتمنى تكوني بخير وعافية يارب ..

بالنسبة للسفر اخيتي لابأس لتغيير الجو سياحة وعبادة ، لكن اذا كانت المشكلة في علاقتك بزوجك ، هل تعتقدين مجرد السفر سيحل المشكلة ؟..


احتاج لبعض التفاصيل لأتمكن من مساعدتك على أكمل وجه بإذن الله تعالى ..

- كم مر على زواجك ؟ هل لديكِ ابناء ؟ كم اعمارهم إن وجد.

- كيف وافقتي على زوجك ؟ ما الذي جعلك توافقين عليه؟

- ما الحياة التي كنتي تحلمين بها أو تتمنين أن تكوني عليها ؟

- كيف هي علاقتك بجميع افراد اسرتك ؟ ومن الأقرب الى نفسك ؟

- كيف هي علاقتك بأهل زوجك ؟

- ماهي اهتماماتك وهواياتك ؟

- ماهي طموحاتك واحلامك ؟


حفظك الله

[ننخاك ياأم البنين]

 
 السلام عليكم ورحمة الله ..
كيفك تقوى شخبارك والله كل مرة ادخل اوايق عليش اشوفش كتبتي لي حاجه اولا .. والله فرحت بردش .. الله يبرد خاطرش بحق محمد وآل محمد..
 
 
كم مر على زواجك ؟ هل لديكِ ابناء ؟ كم اعمارهم إن وجد.
الخطوبة 9 شهور
الزواج سنتين
عندي ولد واحد وعمره 10 شهور
 
- كيف وافقتي على زوجك ؟ ما الذي جعلك توافقين عليه؟
 
السبب الأساسي اني ابي افتك من اخوي لأنه راعي مشاكل واااااااااجد  ومشاكله مع الكل يعني كل يوم هوشه حتى امي وبوي مايسلمو منه يتعدى عليهم (عاق)
السبب الثاني انا امنيتي اخد سيد او شيخ
والحمد لله تحققت امنيتي وزوجي سيد ..
السبب الثالث.. اني كنت ابغى واحد فاهم يفهم الحياة ومتطلباتها
وطبعا استشرت ابوي ووافقني بالكلام قالي اوافق عليه ..
 
- ما الحياة التي كنتي تحلمين بها أو تتمنين أن تكوني عليها ؟
اهم شي تبنى على الاحترام التفاهم الحب ..
 
 
- كيف هي علاقتك بجميع افراد اسرتك ؟ ومن الأقرب الى نفسك ؟
علاقتي بأمي عااااديه .. يعني امي اساسا من النوع العصبي المتسلط .. مااقدر افتح قلبي لها
ابوي .. انسان متفاهمه معاه ودايما  يفضفض لي وياخذ استشاراتي بأغلب الاشياء ..تقدري تقولي اخوي مو ابوي
علاقتي مع خواتي :انا طبعا اكبرهم بس عندي اخو اكبر منا (العاق)
علاقتي مع خواتي يحبوني ويحترموني وسوالف وظحك (يعني الحمد لله مافيها مشكله ابدا ابدا)
 
علاقتي مع اخوي الكبير..
طبعا هو اكبر مني بسنه بس مااطيقه اكره لان قبل كان يضربنا بدون رحمة ..حتى كنا ادا احد ضرباه نستانس عليه ونهلهل ..يعني هالأنسان ماحد يشتهيه كريه كريه وغبي وماعنده غيره علينا يتلفظ علينا بكلام وصخ جدا جدا (لواقدر امحيه من دفتر العيلة كان سويتها لأن ماافتخر يكون عندي هالأخو )وطبعا هو مصايبه مصايب..
 
عندي اخوي اصغر مني بسنة وشوي بس الحمد لله علاقتي معاه سليمة وطيبة وحليوة احبه ولاارضى عليه عكس الكبير فرق شاااااااااسع
 
يعني بالمختصر علاقتي بأهلي الحمد لله ماعدا اخوي الكبير
 
 
 
 
- كيف هي علاقتك بأهل زوجك ؟
علاقتي فيهم امممم مادري شنو اسميها ..
بس انا احبهم ومدحهم لان بصراحه فخر لي لأني ناسبتهم .. بس مشكلتي ان مااقدر اسولف وياهم ماعرف اطلع مواضيع وياهم
يمكن لان هم هادئين وماعرف اسولف معاهم ..
طبعا قبل كنت ازورهم وكانو بيوم الجمعه جمعتهم كنت اروح لهم ..
بس من صار زوجي يغصبي اروح لهم وذا مارحت لهم يزعل ولايكلمني  فصرت مااحب اروح لان اثر بنفسيتي مااحب حاجه غصب عني
 
..بس بصراحه حبوبين وخدومين ويحبوني هم بعد والحمد لله رب العالمين مافي بينا اي مشاكل الحمدلله
 
- ماهي اهتماماتك وهواياتك ؟
احب انشد احب الخطابة ابي اصير ملاية
هواياتي احب ارسم بس احتاج لدورات عشان
 اصير فنانة درجة اولى
احب اتعلم المكياج الحنه
بس انا اخدت دورة رسم بس ماعجبني تدريس الي درست عندها
واخدت دورة خطابة مرتين والحمدلله اتقنت بس يبغى لي اطبق مجلس كامل
ون شاء الله باخد دورة حنا ومكياج عما قريب
 
 
- ماهي طموحاتك واحلامك ؟
طموحي ابي ادرس اداره اعمال ابي اكون شخصيه مهمه بالمجتمع ابي تكون وظيفتي راقيه
 ابي تصير عندي فلوس عشان اساعد زوجي وناخذ بيت
ابي تكون عندي حسينية وبي ابني مسجد
ابي ابني عمارة
ابي ولدي  يصير عالم وهذا انا مخططة عليه قبل لااتزوج والحمدلله زوجي موافقني على هالشيء ومستانس
ابي اساعد الناس وحل مشاكلهم
 
 
 
نسيت حاجه ..
موضوع السفر انا ابي اسافر بس عشان اغير نفسيتي ابي اشوف اماكن تراث او اشياء غريبة
ابي اطلع اتنفس ..
والحمد لله الاسبوع الجاي راح اروح الرحله للمدينة ..
 
ومشكورة ياقلبي على الرد ..لان احس راح تفتحي لي ابواب كانت مسكرة ..
الله يشرح لش صدرش ياااااارب ويحقق امانيش ويعطيش العافيه قلبي

[.:تقوى:.]

السلام عليكم ورحمة الله وبركاته
كيف حالك أختي ؟ اتمنى تكوني بخيروعافية يارب ..

اولا اعتذر على تأخري بالرد

عزيزتي انتي تزوجتي وبعدك صغيرة وماصارت عندك الفرصة لتحقيق احلامك وطموحاتك

والتزمتي بمسؤلية البيت والأسرة ومسؤلية الزوج ، كل هذه الأمور اصبحت كضغوطات عليكِ مما يسبب عصبيتك وتعكر مزاجك ..


طموحاتك واحلامك كثيرة وغير منظمة ، انتي بحاجة للتخطيط لأهدافك ، كيف ؟

اكتبي اهدافك التي تريدين تحقيقها جميعها على ورق ، ثم حددي لكل هدف كم يحتاج لوقت حتى يتنفذ

واكتبي لكل هدف ماذا تحتاجين لتحققينه ..

سيكون لديك اهداف شهرية ، سنوية ، بعد خمس سنوات ، بعد 10 سنوات ...

عندما تحددين وقت لكل هدف ركزي على الاهداف الأقرب والتي بأمكانك انهائها في الأشهر القريبه


وتناقشي مع زوجك بخصوص اهدافك ونظمي وقتك بحيث يكون لديكِ وقت لنفسك ولأسرتك وقت ولزوجك وقت وللأهل كذلك ..

اعتقد بعد سفرك للمدينة جعلك أكثر راحة الآن ، صحيح ؟


اخبريني ما استجد معك


حفظك الله