مدفونة بمشاكلي

[ننخاك ياأم البنين]

بسم الله الرحمن الرحيم

استمارة دراسة الحالة
الجنس /أنثى
العمر/23 سنة
الحالة الإجتماعية /متزوجة
المستوى التعليمي /ثانوي ودرست جامعة 3 سنين وبعدها سحبت .
الوضع العملي/ ربة بيت

المشكلة
انا وبصراحة عندي اكثر من مشكلة وبقدر الامكان اكتب عن كل شيء ونتي بذاتك هل انا امكبرة السالفه او مواضيع عاديه ..
انا انخطبت وعمري 19سنة وباقي اسبوعين وصير 20 سنة برجل اكبر مني ب16 سنة ...ونا وافقت بعد استشارة ابوي لان ابي واحد مثله في الحنان ولان امي عصبيه ماعندها تفاهم ..
طبعا هالرجال فيه عنده مشكلة واهله قالو انه مايقدر يركب درج لان طاح بالحمام وصار عنده ضعف اثرت على حركته ..
طبعا امي كانت معاها جارتها وقالت ان هذا مايعيب الرجال وهو اهم شي يصلي يخاف ربه هذا اهم شي ..
المهم ظليت معاه بالخطوبه حول 9 اشهور فيه مشاكل وفيه حب يعني تقدري اتقولي بالنسبة لي كانت حليوة وفيها مغامرات لان كنت اطلع معاه وامي ماتدري بس كان ابوي يدري .. لان هي تبغاني اطلع معاه بس يوم ..وابوي قالي اطلعي وستانسي وعشان تتعرفي عليه ..

بوقت العرس مادخل لي الصالة لان مايقدر يركب درج ..طبعا انا مقدرة هالشيء بس حز بخاطري كنت ابي احس انه اخذني لان صرت امشي علئ الكوشه ونا بروحي فحز بخاطري ..بس الحمدلله عدت

طبعا بشهر زواجي ماتهنيت كنت مضايقه لان كانو يبنو فوق وكنت اتضايق مرة مرة من الصوت وقررت بعد 3 ايام اروح الجامعه ..بس كنت اسمي شهر العسل شهر بصل عندي لان مارتحت من الطقطق الي فوق ..

بعد اسبوعين اواقل يمكن، موذاكرة، بالصدفة كان زوجي نايم برئ ونا اخذت جواله بشحنه وبالصدفه شفت محادثه بالفيس انا انصدمت جاتني زي الهزة بقلبي تمنيت اني مامسكت جواله ابدااااا ..
الي شفته انه كان يكلم وحده متزوجة وعندها بنت صغيرة .ولما قريت المحادثه اكتشفت انه يكلمها بايام الخطوبه وتسببت لي صدمة ماعرفت شسوي فيه ماتوقته ابدااااا بهلطريقه .يعني المفروض الي قده عاقل ماعنده هلحركات ..
وصارت مشكلة بيني وبينه يقول انه مسواي انا الي خليته يتجه لهطريق ،لان اذا زعلت منه اروح الغرفه اقعد بروحي ..
طبعا انا استنيته يطلع وسهرت على اللابتوب ساعات طويله وطلعت الرقم السري حقه وفتحت فيسه وايميله .وشفت انه هو بالاساس كله يتعرف علئ بنات وقصص حب يعني قبل لايخطبني هو كذا يتعرف ..
وبعدها فتشت بلابتوب وشفت افلام اباحية ونقهرت مسحت كل حاجه وفتحت الملفات حبه حبه ومسحتهم ...

طبعا قلت بنفسي دام بلابتوب فيه يعني اكيد اكيد بجواله فيه .
وستنيته يرجع ينام وخذت جواله وشفت نفس مانوقعت هو منزلهم ..وغير الي يرسلونها اصحابه حسبي الله عليهم كلهم ..

وشفت بعد انه كان امكلم نفس دي المرة بالفيس يقولها تغير اسمها فيه مشكله صايره ..
هو طبعا خاف عليها مني لان هددته لو اعرفها بسبها وكذا ..

وطبعا رحت فتشت بالاسماء ولقيت رقم جوالها .. بس انا ماسويت لها شي ماكلمتها ..
بالرغم اني جاتني صدددددمة قمت اصيح وضرب روحي وقلت بطلق ماابيه مابيه .. ولما دقيت علئ ابوي قلت له بطلق لان بينا مشاكل ومانتفاهم .ابوي رفض لان يبي يعرف المشكله بالظبط شنهي .ونا مستحيل اقوله ..
المهم ..
انا كلمت زوجي وقلت انه هذا غلط وحرام ونت المفروض ماتسويها لانها حركات مراهقين ولا لك عذر بهالشيئ ...
طبعا هو قام يصيح وحلف لي بالقرءان انه مايعيدها . ونا سامحته..
طبعا انا عودت حياتي وعتبرت كل انسان بيغلط بس دام انه اعترف يعني تاب خلاص..

بعد شهر من السالفه مسكت جواله باااالغلط وشوف منزل برنامج اسمه شات وفيه محادثه مع وحده وشوف كلام وصور وهو راسل حقه حتى الطوف يبين ينعرف انها بالشقه .. ويقول لها كلام استغفر الله ربي .انا هني قمت اصييييح وكنت اصيح من قلب وقلبي يطقطق موعارفة شسوي بحياتي ..رحت قعدته من النوم وطبعا نكر ... يقول هذا ولد اصلا موبنت ونا قاعد اتلعب وكدا ..

طبعا سويت مصيبه ابي اتطلق منه و ضربته بصدره من القهر خليته يصيح ويقول دي زله من الشيطان ومراح اعيدها ..وحلف بأمه وابوه وحط ايده على القراءان وحلف وقال اخر مرة وطلب مني اسامحه..
انا راجعت روحي قلت بسامحه واخر مرة له ..
وتالي صالحته صار اسبوع زين وياي وصرت بين فترة وفترة اخذ جواله اشيك اذا فيه شي عشان يطمأن بالي .. وصرت استانس اذا مااشوف شي ...
بس بعدها بفترة اذا دخلت علئ وتسابه اشوفه يمسح محادثات اصحابه ...
وتالي طوفتها له ..
تالي اليوم الثاني اشوف اصحابه يرسلو افلام وهو يقول الرابط مايفتح عندي ... ويقوله ارسله بعد ابي اشوف .
انا قلت هلأدمي وش اسوي فيه مع دولين ..
طبعا رحت قلت له وستحرق لان اخدت جواله وكالعاده ينكر يقول .انتي قلتي بنفسش الرابط مايفتح يعني ماشفت شي ...

المهم ظليت معاه كل يوم علئ هلحاله دي وهو من النوع الي اكثر شي كله بهلجوال هلحريقه الي ماشفت منه غير البلاوي والمصايب ..
المهم انا حملت ونشغلت يعني خلاص هو وعدني انه ماراح يشاهد .حتى اصحابه ادا بيرسلو له صار يطلع من لقروبات عشان لايرسلو ..
ويقول انه كلمهم ..

المهم انا صرت احاول ارجع ثقتي فيه ..

فصرت كل بين فترة وفترة اشيك ..
بعد الولادة الي هي سنه الجديدة من بعد دي الهوشات قلت خل بشيك على جواله ورحت اشوف في الاسماء المحضورة
وشفت بنات تقريبا 3 اعتقد محضورين ولما شيكت على اساميهم طلعو ناس وصخه .. ياخذ ارقامهم من برنامج نسيت اسمه ..
وهاوشته وتناقرت اياه وقال هم الي يجون لي ونا احضرهم .
انا ماصدقته لان بالنمبر بوك يطلع لي اسمها..يعني مثلا نوف شات وهو نفس البرنامج الي كان يستخدمه قبل ..

مرة هالسنه الثانيه ولاصرت افتش هونت تقريبا لان صرت اشيك عليه من بعيد لبعيد يعني بالشهر مرة وساعات مااداني جواله .
هالسنة هاذي اعتقد بجامدى يمكن
تهاوشنا مادري علئ شنو وخليته مارحت صالحته نفس العاده قلت بخليه هو الي يجي يصالحني ...
المهم صار يطول برئ يعني يسهر انا تضايقت وستنيته يجي ينام وطبعا جا .
ونتهزت الفرصة وخذت جواله وقمت افتش فيه ..
لقيته امنزل برنامج جديد موذاكرة شنو هو .. كان يكلم وحده اكبر مني بسنه وشوي .. ولاحظت من كلامها اياه انها هي كلامها عادي وماتعدت حدودها يعني اطمأنيت ..
وهي طبعا رسلت صورتها طلبا منه هو .. وطبعا مسحها رحت ادورها بالصور مالقيتها ..
يعني الي لاحظته بدي البنت انه ماقالت كلام وصخ ..
عكسه هو كان يكلمها بقلة حيا وهي تستحرق فيه ....
انا لما شفت كذا قلت ماراح اقعده من النوم ... بكلمها وطبعا كلمتها نيابه عنه
يعني اكلمها كأنه هو ..
ورحت له علئ طول ونا اصيح اقوله تعال شوف وشو هذا الي بجوالك منهي دي؟؟
قام يصرخ يقول والله موبنية والله
ونا قلت له ان دي بنت ونا عارفه ومبين اصلا .قالي تعالي المطبخ ونسولف . وطبعا رحت وياه ..

قام يقول هذا صاحبي ونا قاعد اتلعب عليه ولحين بتصل قدامش .. وسوئ روحه يتصل . بس يتصل ويسكر علئ طول .. يقول الحين هو نايم ..
طبعا ماطاف علي الموضوع قلت له بصبر وباشوف ..


وطبعا انا امكلمتنها من قبل بس هو مايدري ...

وتالي قلت له بالمغرب ونا نازله بحف.. ترئ انا كلمتها نيابه عنك .. وهو حسيته خاف موعارف وش يقول .. وتالي قال عادي . انتي نزلي الحين ..
ومن نزلت راح وكان يسرع ..

المهم رجعت من البيت وستنيته ينام ..
ونا اخدت جواله ورحت بكلمها ..
وشفتها شبكت وكلمتها ..
وقلت لها كيفك حبيبتي وكذا ..

قامت تسأل تقول منو انت .. وشنو اسمك ونا شنو اسمي..
سويت روحي اني اقوللها اشفيك نسيتيني وكذا ..
قلت لها انش عايشه ب... ونا اسمي ....وقامت تسأل تقول طيب شنو اسمي ..قلت لها نسيت

قالت خلاص اجل مع السلامة
وطبعا من حسيت انها بتحضرني قلت لها انا زوجة فلان .وهو ترئ عمره كذا يعني قص عليش ..(لان كان امصغر روحه وااااااجد)
وهي انصدمت ..
تقول بس هو ماقال انه متزوج ..
وشرحت لها كل شي عنه انه لعاب قاعد يتسلئ وقامت تتحسب عليه ..
ولما سألتها ليش قمتي اتحققي اياي قالت هو الي قالي مااكلم اي احد لان في احد يلمس جواله ..
وطبعا كلمتها وكلمتني باحترام ونهيت السالفه وحضرته حتئ اسمها قالت بتغيره وخلاص حذفته البرنامج وكل شي ..
ورحت واجهته ..
وقال دي عندها سالفه هي متهاوشه مع رجلها ونا قاعد احل مشكلتها وعندها ولد يشبه ولدنا .. اقوله الحين بتحل مشكلتها ومطنش ولاتدق خبر لمشاكلنا ..
وطبعا كان الجوال داعستنه وبالغلط شكلي قعدت علئ الشاشه واجد ونكسر للاسف ..

طبعا انا ماسكت كلمت عمي الي هو ابوه وقلت له انه يكلم وحده ..
وجا عمي ولافهم علي للاسف الشديد ..
لان زوجي راح قاله انه في وحده تتلعب عليه وقام يقوللها كلام وصخ ...


يعني الي سواه نكراه قدام ابوه ونا انقهرت من حركته ..
وجو اهله يفهموني مااكبر السالفه ولااتطلق لان الولد بيضيع بينا ..
انا خفت علئ ولدي صحيح وقلت براجع روحي ..
وبعطيه فرصه وسامحته بعد اقناعات منه ..
وفيه بعد صدته بنفس السنة انه يكلم وحدة بالفيس بس للأسف كان يكلمها وهو قدامي يعني صار له تقريبا سنة ..
السنة الي كنت حامل فيها الى السنة الي ولدت فيها للأسف الشديد انه ماتغير ونعدمت الثقه فيه ..
والله يتقوى على هلموضوع شاغل بالي الا اني موعارفه الاقي له حل ..

والمشكلة الثانيه اني احسه موحامد ربه انه تزوج .. لان هو خطب تقريبا 14 وحدة وماقبلو فيه ..
هو عنده مشكله وهي انه لما طاح بالحمام صار عبارة فيه شلل نصفي على حد تعبيري انا وشوفتي له ...
لان مايقدر يقوم ولايقعد بالارض حتى الصلاه يصلي وهو جالس..
حتى الطلعه مااقدر اطلع وياه نتمشى او نشتري .كل طلعتانا بالسيارة وحنا جالسين يعني مافي حركة ..
احس روحي محرومة
لاطلعه معاه
لانروح مطعم ولانشتري اثياب .وحتى اغراض البيت هو يوديني ونا انزل بروحي اشتري .
حتى السفر موراضي يسفرني .يقول اذا حجت البعارين بسفرش معاي .
حتى بالج.... مااستمتع اياه بصراحه .
بس مرتين ..
يعني الج.... مااحبه لانه هو احسه مايقدر ولابسهوله ولاابي اكسر بخاطره اقوله انت ماتعرف .. او سوي لي كذا لان ادري مايقدر . ماعدا الوضع الجانبي اسهل شي له بس ناحيتي انا ماارتاح كلش ابيه بس يخلص وقوم ..

المشكلة الثالثه وهو انه عصبي كل شي يزقر علي فيه .. وماعنده تفاهم يصارخ علي على اقل سبب وهذا الي امحزني وكاسرني ..
يعني اي شي يصير له من برى يبرد الحرقه فيني ..
سواء اذا كنت معاه بالسيارة ويجي احد يطق له هرن .وزوجي على يسب .وسباته وصخه .. انا اذا قلت له لاتسبهم هذا شي عادي حتى انت اطقطق هرنات ..يقوم يسب فيني وصرت كذا مرة انصح وتالي من شفت اني انسب وتهاوش وياه صرت اسكت ...
والمشكله اني صرت احفظ سباته صرت حتئ اقولهم بداخل نفسي ..
وقلت له لاتسب قدامي لان احفظ وقعد احللهم بداخل نفسي .. (يعني احلل السبه شنو معناتها ولمن تنقال بالظبط وكذا )

والمشكلة الرابعه
انه اذا تهاوشنا مايجي يتفاهم اياي لان لو تفاهم برضى .احب الرجال اذا غلط على مرته بشيئ يجي يعتذر يبرر لروحه ..
زوجي لا. يحب تفتعل المشكلة ونظل اياااام مانكلم بعض ولايجي يعتذر او يقول انا غلط بحقش ..
انا اذا شفت كذا ادوس على عمري وروح اصالحه لان مستحيييييل هو يجي ..
والاسباب الي نتهاوش عليها تااااافه تافه وماتحتاج لهواش ..
زي مثلا اخر مرة تهاوشنا عليه عن الباب ..
هذا الباب من زمان ماتغير يعني من يقبل لايخطبني هو موجود صار له سنين 5 يمكن او اكثر ..وصار فيه صدى في القفل وقلت له غير ..
طبعا جاب اخوه الي اصغر مني بثانوي وحاول يعدل فيه ..
لما جيت انا فتحت الباب وعلق ..
قلت له ترئ بيكحلها عماها وغير كذا خرب اليدات .بس قلت له بأسلوب بارد انا ..

طبعا استحرق وسوا لي هوشه وقالي موعاجبنش روحي بيت اهلش مليت منش ويلعن ابو الزواج ..

انا هني انصدمت .. هو سألني ونا جاوبته انه ماسواه عدل بس هذا الي صار ..

ونا شلت اغراضي وغراض ولدي وطلعت بيت اهلي نفس ماابغى هو ..حسيته تافه تافه على اقل شي يتهاوش ..


المشكلة الخامسة ..
ان هو رافض اشتغل وكلما دورت وظيفه احسه يخرب علي
مرة كنت بتوظف بكوافير وهو كان رافض هالشيء ..يقول ولدش وين بتوديه ،، ونا مانا فاضي لش اوديش وجيبش ..يعني الزبدة مايبيني اروح ..


ومرة قدمت على الصناعيه قلت بشتغل مع اختي ..
قال انا مابوصلش ولوتأخرتي مراح اوديش هلمكان اكسر سيارتي ..
طبعا انا موعتمده عليه يوصلني انا بروح مع اختي بسواق ..
بس هو اذا يبي يخرب يعرف يطلع حجج..


بالرغم ياتقوى
انه بالعقد وقدام امي وعمي وخالي والملا شرطت عليه ادرس وشتغل بس عمي قال للملا لاتكتب هذا الشرط ويتفاهمون هم احسن ..
بس قوله انت انها بتدرس وتشتغل ..

وطبعا الملا قاله. وزوجي ماخالف وافق على هالشيئ..اني ادرس وشتغل ..

ولحين لما صارت الصجيه وقلت بشتغل ماهو راضي ويخرب علي ويسوي لي هوشه ويقولي تبين تشتغلين روحي بيت اهلش ..فصارت حياتي كل كده انا ابي اشتغل وهو يخرب ..


يعني من البدايه لو قال انه رااااافض كان امي ماوافقت عليه اساسا ..ليش يخدعنا ..الحين لما ظمن الزواج والولد وغير الولد الي جاي بعد كم شهر بيقطني !!!!ويقول اصلا انا مومتعطل عليش عاد كنتي وياي او بدونش ..
المشكلة انه كلامة موصج.
يعني كيف يقول انه مومتعطل ونا الي صايرة له عبارة ايده ورجوله الي يتحرك فيهم ..

لو في شي بالارض مايقدر يشيله حتى لو خفيف ..
انا الي البسه الملابس الداخليه (الهاف)وعذرا على الكلمة
ونا الي اذا تعطل شي بالبيت اسويه يعني اغير اللمبات . انا الي انزل من السيارة اشتري له ..ادخل عند لرجال .يعني مرة ورجال بنفس الوقت ..
وغير التنظيف حق الشقة ..
والله يتقوى اشياء واجد اسويها له حتى ونا حامل احمل اشياء ثقيله
واخر شي يقولي انتي ماتسوي شي لي ونا مومتعطل
!!!!

وهو حتى ولده مايمسكه يوديه لااهله ..
هو يقول هلكلام لان شاد الظهر بأهله وعنده خواته ممتزوجات شاد فيهم الظهر يمسكوه ولو بغى يربوه ويجلس عندهم للأبد ..


لكن لو تجين من ناحيته مستتتتتحيل يمسكه حده حده يسوي له الرضاعه ويكوي ثيابه .. اما ينومه يربيه يطلع وياه يستحمله مستحيل مايقدر عليه اصلا هو ..
المشكلة السادسة
انا اتضايق من الشقه .شقتي كاااتمه نفس السجن بالظبط تضيق الصدر حتى اهلي مايجون لي لانها تكتمهم ..
ونا مااقدر استقبل فيها اي احد كان لان مومرتاحه فيها ..
مواصفات شقتي
انا ساكنة تحت بالطابق الارضي
وتتكون الشقه من..
صاله وغرفتين وحمام ومطبخ ..
الصاله مكاني الاساسي الي اقعد فيه بس المشكلة ان تصميمها غلط
نافذة مافيها يعني مافي شمس .ومااعرف افرق بين الليل والنهار كاتمتني ..
وكذلك الباب حقها موقع غلط ..
يعني افتح الباب يصير جنبي بيت عيالي وعلى يميني مجلس لرجال وقدامي ممر للجميع ..
يعني اي احد يفتح الباب يقدر يشوف الشقه كامله .
طبعا انا ناقشت زوجي بهلموضوع وقلت له يغير موقع الباب مكانه فاضح .وطبعا رفض وظليت اشهور احاول فيه مارضئ ..

تالي كلمت ابوي وقلت له وخليته يجي الشقه ويكلمه وقاله يايغير الباب او يحط شي ساتر .

طبعا نفذ هو حط هذا الشي ناسية اسمه لكن .. يعني تقريبا انحلت اشوي ..بالرغم فيه فتحات يبان الي جالس بس شي احسن من لاشيء ..
ودي الشقه بصراحة مانا مرتاحه فيها تجيب الهم والله العظيم اتضايق منها وتجي لي كتمة من اجلس فيها وكله اصيح لان مافيها متنفس ..
لاصاله اقدر اتنفس فيها ولا غرفتي اتضيق الخلق .هو مسوى التصميم والمكان موعدل ..
وكم مرة كلمته يعدل فيها ابي شمس يدخل فيها يقولي روحي سكني بيت اهلش او خلي ابوش يعدلها ..
والله ياتقوى وش اقول وش اقول مافي شي مرتاحه منه كلما اطقها عوجه .
وهذا الي امحسسني بالنددددددددم اني تزوجت لان اعتبر زواجي فاشل وهم على قلبي . ..
وهذت الي كتبته شيء من لاشيء من الي فيني ومستحملتنه .
احس بضيق ياتقوى والله بنفجر .
هالزوج مايتفاهم معاي احس الحياه صعبه موعارفه شسوي بعمري .
كم مرة يخطر على بالي ابي اطعن نفسي بس اتعوذ من ابليس لان عايشه بحزن مادري كيف اتخلص منه ..
والله ياتقوى هلكلام الطووووووووويل الي تشوفي ماحد يدري عنه ونا ماافضفض لاحد .ماحب احد يسمع مشكلتي احس لو فضفضت بقعد احاتي ماحب احد يدري عن حالتي الا ناس مختصه بهلشيء لان عارفه بلقى حل ..
غير لمن اقولها الى امي خواتي صاحباتي يمكن احصل تالي كلام مايعجبني ولايريحني يعني مثلا رجلش كذا يوصفوه بصفات مي زينه مثلا ..
ونا احب اظل ويظل الي معاي بسمعه نظيفه حتئ لو غلط بحقي. ماابي اشوه سمعة احد ..
عشان كذا مستحيل الجأ لأي احد حتى لو صديقة عمري مااقول لها مستحيل ..




يعني انتي شوفي وحكمي بنفسش وحلي لي المشكله موعارفه شسوي بعمري .
انا صج انا ظالمة لو مظلومة..؟؟؟؟
لان زوجي يقولي اني انا راعيه هواش ..
ووالله ياتقوى هو الوحيد الي اتهاوش معاه ..وحس براحه اذا رحت بيت اهلي لان افتك من هواشه ..
بس ماارتاح لان تظل المشاكل براسي ..

اقترحي علي ياتقوى انا ماتكلمت الا ونا واثقه فيش بتحليها ..ووش اسوي
ابي احد يكلمه ويفهمه لان مايسمع مني حاولت وحاولت وتنازلت بس مافي فايدة ..
يسمع من الناس ولايسمع مني ..
ادري طولت بس ماباليد حيله .انا لو مافضفضت لش الحين الكلام بيندفن معاي ماحد يدري عنه ..
واسفة لان طولت بتنهمي ونتي تقري الله يعينش ..
اتمنى تقوى اشوف عندش حل لكل شي قلته لان تعبت ونا اكتم بروحي ..

وفي شي ماكتبته ..
صايرة دايم افكر واسرح حتى بالصلاة ماعندي تركيز صاير وحس بضغط نفسي ..
ابي اتخلص من هالتفكير السلبي امتعبني واجد ..
وبي اوثق بزوجي . لان بعد الي شفته منه مواثقه فيه ابدا صارت عندي عقدة وشك فيه حتى لو ماسوى شي ..
الثقه معدمة كلش ..
ابي اتخلص من هالأشياء والله تعبانه وحس بحاجه بقلبي ابيها تطلع بس مي راضيه تطلع ..
صايرة من احط دعاء الحزين اصيح من قلب بس بدون صوت وحس في حاجه ثقيله داخل بقلبي ..

ويش اسوي عشان ارتاح انا هلزواج تعبنيييي خلا نفسيتي تعبانه ويائسة من الحياة .
وش اسوي
والله حتى اقول ليتني ماعرست ليت بس .. ولويرجع الزمن لورى كان فكرت قبل لااتخذ هلقرار ..
جد جد متألمة وحزينه على روحي .
لان مانا حاسة لااني متزوجه ولااني مطلقه ..
ريحيني من هلتفكير ياتقوى .ليت اقدر اكلم احد ورتاح بس ليت ..

وبقولش صفاته الزينه..
هو. ينفق ويعطيني مصروفي كامل ومايقصر بصراحة رايته بيضا ..
اي شي بغيته وهو عنده عطاني ..

اذا ابي اروح مكان مثلا حسينية او دورات مايقصر بعد يوصلني ويستناني مايخالف هو.. وده شي زين فيه ..
وحتى اذا تهاوشنا يشتري لي اكل ويحطه عندي ويروح .

بصراحة رايته بيضا وماعليه قصور ..انا من اتذكر كرمه اقعد اسامحه .. بس بنفس الوقت مااقدر انسى المشاكل لانها مانحلت اصلا..

[.:تقوى:.]

السلام عليكم ورحمة الله وبركاته
عظم الله أجورنا وأجوركم بمصاب أبي عبد الله الحسين عليه وآله أفضل الصلاة والسلام

اهلا بكِ اختي الكريمة ، شكرا لطرح مشكلتك ولثقتك بنا
كيف حالك ؟ اتمنى تكوني بخير وعافية ..

عزيزتي كونك في بداية العشرين من عمرك وقلة خبرتك بالحياة وعدم وجود من يوجهك ، أمر طبيعي أن تشعرين بهذا الضغط والارهاق النفسي وتتصرفين بتخبط وكثرة المسؤليات الأسرية يجعلك غير قادرة على السيطرة ..


اولاً اخيتي اريد ان الفت انتباهك أن أي مشروع ننوي الاقدام عليه يحتاج منا دراسة دقيقة ومفصلة ، ندرس نجاح المشروع وكيفية تطويره
وكذلك في حالة الخسارة ندرس كيف نصلح الخسارة ونحولها الى ربح .. كذلك مشروع الزواج يحتاج منا دراسة قبل أن نقدم عليه

بالنسبة للخاطب ومواصفاته وامكاناته ودراستها إذا كانت تناسبني أم لا ، وفي حالة وجود مشكلة صحية يعاني منها أو أي مشكلة أخرى
قبل أن اوفق عليها عليّ دراستها والتفصيل فيها وفهم كيف ستكون حياتي معها ..

فعندما ذكرتي ان زوجك تعرض لسقوط اصابه بشلل نصفي ، هل فكرتي ما مسببات الشلل النصفي ؟ هل بحثتي ؟ هل حاولتي معرفة إذا كان هذا الشلل سيؤثر على حياتكما الزوجية وواجباته ؟ هل تأكدتي إذا كان تعالج من الشلل والى أي درجة وصل العلاج ؟ .. هذه الاسئلة كان يجب عليك معرفتها قبل موافقتك على الزواج .

فعندما تقولين انه تقدم للكثيرات وتم رفضه هذا يعني ، وان المرأة التي كان من طرفها قالت ( انه سقط بالحمام وهذا شيء لا يعيبه ) ، هذا يعني انه يوجد شيءغير واضح .. !!

لا اريد عزيزتي أن افتح ابواباً لكِ قد تفتح مشاكل جديدة في حياتك ولكن أنا الفت انتباهك وانتباه كل فتاة مقبلة على الزواج أن اي أمر غير واضح يجب التبحث والتفصيل فيه جيداً قبل الاقدام عليه ..

الآن وقد تم الزواج والحمدلله ، إذا ًعليكِ قبول ما انعم الله عليك به وتذكري النعم لا ما ينقصك
نعمة الستر ، نعمة السكن ، نعمة الصحة والعافية ، نعمة زوج كريم ..


قبل أن نناقش المشاكل التي تعانين منها سنلخصها في نقاط :
1- العلاقات الغرامية للزوج
2- الفاظ الزوج البذيئة
3- عصبية الزوج
4- مشكلة الشقة غير مريحه
5- تحملك لمسؤليات الأسرة وبعض مسؤليات الزوج
6- السفر والترفيه لعدم قدرة الزوج

اريد منكِ اخيتي تفحص المشاكل التي كتبتها كنقاط والتأكد منها وفي حالة نسيان أي مشكلة يمكنك اضافتها
كذلك فكري بحل من وجهك نظرك لكل مشكلة في حالة كانت المشكلة لبنت أخرى وليس انتي ، كيف ستجدين الحل لها ؟


تذكرتي اخيتي قبل ان نجد الحل للمشاكل التي تمرين فيها ، لا تفكري بتغيير زوجك ، تقبليه كما هو فالرجل يشعر عندما تحاول المرأة تغييره وهذا يعني له انك لا تتقبلينه .. فأول الأمور يجب تقبل الزوج ..



اهتمي بنفسك وكوني بخير
حفظك الله

[ننخاك ياأم البنين]

السلام عليكم ورحمة الله
كيفك اختي تقوى اشكرك جزيل الشكر على تجاوبك وياي واتمنى منك العون لأن هلمشاكل ماراح يحلها الا الي فاتحين قلوبهم ويستمعو ويحبو مساعدة الناس ..
اتمنى الاقي عندك الحلول عشان اعيش حياتي..


اهلا بكِ اختي الكريمة ، شكرا لطرح مشكلتك ولثقتك بنا
كيف حالك ؟ اتمنى تكوني بخير وعافية ..
هلا هلا فيك عيوني تسلمي على السؤال ..انا والله حالي انتظر ردش من اول ماكتبت الموضوع..


اولاً اخيتي اريد ان الفت انتباهك أن أي مشروع ننوي الاقدام عليه يحتاج منا دراسة دقيقة ومفصلة ، ندرس نجاح المشروع وكيفية تطويره
وكذلك في حالة الخسارة ندرس كيف نصلح الخسارة ونحولها الى ربح .. كذلك مشروع الزواج يحتاج منا دراسة قبل أن نقدم عليه

بالنسبة للخاطب ومواصفاته وامكاناته ودراستها إذا كانت تناسبني أم لا ، وفي حالة وجود مشكلة صحية يعاني منها أو أي مشكلة أخرى
قبل أن اوفق عليها عليّ دراستها والتفصيل فيها وفهم كيف ستكون حياتي معها ..


صح كلامش المفروض يصير هلكلام ادرسه ..بس انا ماكان عندي اي خبرة بهلمجال ومافي احد من الاهل يعطي هلمعلومات للأسف ..
والدليل (صرت اقول لنفسي لو ادري ان الحياة الزوجية كدا كان فكرت الف مرة قبل مااتزوج)


فعندما ذكرتي ان زوجك تعرض لسقوط اصابه بشلل نصفي ، هل فكرتي ما مسببات الشلل النصفي ؟ هل بحثتي ؟ هل حاولتي معرفة إذا كان هذا الشلل سيؤثر على حياتكما الزوجية وواجباته ؟ هل تأكدتي إذا كان تعالج من الشلل والى أي درجة وصل العلاج ؟ .. هذه الاسئلة كان يجب عليك معرفتها قبل موافقتك على الزواج .


هو المرض الي فيه مو شلل ..
المرض الي فيه كان قبل عادي يمشي مثلنا وحركته عاديه..وتالي بيوم العيد كان يسبح قام من البانيو تزحلت من الصابونه الي بالأرض وطاح على شي موعارفه شنو هو بالظبط ..بس على حسب كلامه ان لما طاح .طاح على شي ادى الي تحرك الفقرة الاخيرة ..
ونلوت رجايله .. يعني بالظهر صار عنده تحرك بالفقرة..
ولرجول صار عنده تمزق ورباط صليبي وضعفت رجوله ..

هذا الكلام الي قاله لي في وقت الخطوبه..

ونا لما شفت حركته ومشيته سميته شلل نصفي(لان مايقدر يسوي كل حاجه بسهوله
المشي لمسافة..الركض ..الجلوس بالأرض..حمل اغراض..روحه المستشفيات ..سواء كان فيها درج او مافيها ..لازم ياخد احد اياه..
حتى بالسيارة قومته ثقيله..وغيره وغيره)عشان كذا انا اعتبرته شلل نصفي..
طبعا هو قبل لايخطبني راح بيتعالج وقالو له ان نسبه نجاحها ضعيفه..
ووبعد الزواج راح تعالج جاسم بهمن لمدة ثلاث ايام..بس مااشوف تحسنت حركته..
وكذلك قبل شهرين كلم دكتور من الاردن ورسله ادويه بس مااشوف نتيجه واضحه قدامي..
ولحين هو قاعد يشترك بجمعيات عشان بيسافر للعلاج..

فعندما تقولين انه تقدم للكثيرات وتم رفضه هذا يعني ، وان المرأة التي كان من طرفها قالت ( انه سقط بالحمام وهذا شيء لا يعيبه ) ، هذا يعني انه يوجد شيءغير واضح .. !!
والله أختي تقوى مادري شنو السبب الاساسي ..المشكلة يقول لي انه لو عنده افلوس كان اخذ على راسي وحدة ثانية ..


قبل أن نناقش المشاكل التي تعانين منها سنلخصها في نقاط :
1- العلاقات الغرامية للزوج
2- الفاظ الزوج البذيئة
3- عصبية الزوج
4- مشكلة الشقة غير مريحه
5- تحملك لمسؤليات الأسرة وبعض مسؤليات الزوج
6- السفر والترفيه لعدم قدرة الزوج

7- عدم الثقة فيه الرجوع للخيانة السابقة
8- عدم التفاهم وتقبل النقاش..
9-عدم الاهتمام بي(يعني مثلا اذا تزاعلنا مايجي يسألني عن شي ولايجي يراضيني ..يعني عادي نظل متخاصمين لأسابيع )
مثلا امس انا كلمته اني مش مرتاحه من الشقة ووضحت له اشقد هي جايبه لي كتمه وظيق.. وقلت له خل نجرب نطلع منها بس شهر انغير نفسيتنا نسكن بشقة لمدة شهر فقط عشان اتنفس اشوي حتى لو تبيني انا ادفع مايخالف..رد علي بأسلوب متعصب
يقول:انا طلعه من الشقه مانا طالع ولابغير فيها شي عاجبنش عاجبنش موعاجبنش روحي بيت اهلش ..ونا مابخسر افلوسي عشانش ..
بالرغم ياتقوى انه عنده الحمدلله ..يعني يقدر يدفع بس قاعد يتحجج..



اريد منكِ اخيتي تفحص المشاكل التي كتبتها كنقاط والتأكد منها وفي حالة نسيان أي مشكلة يمكنك اضافتها
كذلك فكري بحل من وجهك نظرك لكل مشكلة في حالة كانت المشكلة لبنت أخرى وليس انتي ، كيف ستجدين الحل لها ؟
والله يتقوى المشكلة موفيني ..
هو بس لو يتفاهم اياي اتصير ايدي وايدة يد وحدة ماتصير مشاكل وكل شي بالتفاهم والاقتناع ينحل ..

لو مثلا بقدم حلول للمشاكل
1- العلاقات الغرامية للزوج
دي تعتمد على خوفه من ربه وضميره يعني تعتمد على تربيته دامه بالأساس من سنين وهو يكلم ..مااعرف
فما اعرف اشلون احلها بصراحه لان تعتمد عليه هو ..فما ادري شنو الحل..

- الفاظ الزوج البذيئة

السانك حصانك ان صنته صانك ون هديته اهانك..
المشكلة ياتقوى لو كلامه مثلا كلب حمار يمكن سهل اني اقوله لاتشبه الناس بحيوانات .
بس سبه قوي قوي ويدخل بالشرف مثلا
(ولد كلب..ولد حرام..ولد شرموطه .. العن دينك ..يعني يعني الفاظ جدااااا قوية مااقدر اكتبها بس انا كتبت لش كم وحدة عشان اوضح لش شقد هي ماتتقبل..

3-عصبيه الزوج ..
العصبيه حلها اني اسكت عنه ...بس شلون اخفف منها ماادري..

4- مشكلة الشقة غير مريحه

يسوي لي شقة فوق ونا الي اصممها..
(بس المشكلة فيه اهو مابيقدر يركب الدرج)
نسكن بأجار يكون فيها اصنصير..

5-تحملك لمسؤليات الأسرة وبعض مسؤليات الزوج ..
هذا انا اعتبره شي انفرض علي ...يعني غصبا عني موطيب..لأن لو انا ماقمت بهلشيء..هو راح يستعين بأخوه ونا ماابي كلما صار حاجه يروح يطلب من اخوه يساعده فشيله..

6-السفر والترفيه لعدم قدرة الزوج
هو مايبي يسافر اياي..
والدليل انه سافر مع ابوه وركب الطيارة اعتقد جابو له كرسي متحرك..
وكذلك راح الكويت مع اولاد خالته لأجل علاج..
.
يمكن الشي الي بيخطر ع بالي اذا بسافر يستأجر له هندي يساعده ..لأن لو بيعتمد علي انا مااقدر هو ماشاء الله ثقيل وذا طاح مااقدر اشيله ..

اما فقرة 7 و8 ماعندي اي كلام لأن لو عندي حلول كان ماكتبت..
ورحم الله والديش عيوني

[.:تقوى:.]

السلام عليكم ورحمة الله وبركاته
اللهم صل على محمد وآل محمد الطيبين الطاهرين

كيف حالك اختي ؟ اتمنى تكوني بخير وعافية يارب ..


طيب عزيزتي ، بالنسبة لمرض زوجك عليكِ تقبله وتقبل زوجك وامكاناته
فقبل زواجك كان لكِ علم بوجود مرض وحتى لو تعرفين كل تفاصيله ، الآن هذا زوجك وهذا وضعه الصحي
والجيد انه مستمر بالبحث عن علاج لنفسه ، ساعديه في هذا الأمر ..

نأتي لتفصيل المشكلات التي تعكر حياتك الزوجية ..

اول الأمر عزيزتي تذكري أن حل كل هذه المشكلات يعتمد عليكِ بالدرجة الأولى ، فعندما تغيري اسلوبك وطريقة طرحك سيتغير هو ..

1- العلاقات الغرامية للزوج
*
لاحظي ان علاقاته لا تتعدى وسائل الاتصال ، اي هو لا يفكر بالارتباط ولو كان يريد ذلك لفعل
كذلك هو لا ينسى مرضه والذي تم رفضه مسبقا من الكثيرات ، والوضع المادي ، و ردة فعل أهله وامور كثيرة ومنها انتي
والدليل أنه يخفي عنك .أما قوله لو يملك المال لتزوج فهذا فقط لتغضبي ليس إلا..
*
أنتي بحاجة لمعرفة ما الذي يبحث عنه من هذه الغراميات ؟ واعتقد انك لاحظتي الحديث بينه وبينهم يدور حول ماذا
- هل يتكلم معكِ بنفس الاسلوب ؟ والكلمات نفسها ؟ أم يختلف ؟

توقفي عزيزتي عن تفتيش جواله ، فهذا لن يزيدك الا ألم وعدم ثقة بزوجك وتنافر بينكم ومشاكل لا تنتهي ..
وعندما تتوقفي عن التفتيش سيلاحظ هو وقد يسألك ، عندما يسألك قولي له ( لأني أثق بك ، أنت رجل تقي لن تلعب ببنات الناس
أما المشاكل التي تحدث بيننا بسبب الغراميات فهي لأني أغار عليك واريدك لي وحدي ) فقط
*
عبري عن حبك له ، كرري عليه كلمات الحب حتى لو يقلها هو ، انتي عوديه لأجل نفسك
لأنكِ انتي لا تتفوهين الا بالكلمات الجميلة الرومنسية ، لأنكِ (أنثى ) رقيقة ، رومنسية ، هادئه ، مغريه ، مثيره ، جذابه ، جميله ..

أهتمي بنفسك اخيتي، بمظهرك ، بشخصيتك
افعلي الشيء لنفسك اولا ثم لزوجك واسرتك ..
تزيني لنفسك اولا ، و دللي نفسك لأنك تستحقين الدلال ، لا تنتظري زوجك هو من يدللك او يهتم بك
أنتي اهتمي بنفسك ، الرجال ينجذبون للمرأة المهتمة بنفسها ، المحبة لنفسها

** ويبتعدون عن المرأة كثيرة الطلبات و الشكوى ، المتذمرة ، الغاضبة ، كثيرة الصراخ .. إياكِ أن تكون بكِ أي من هذه الصفات

انصحك بمتابعة الاستاذة رهام الرشيدي ، ابحثي عن موقعها في محرك البحث
وكذلك الاستاذة لطيفة اللوغاني


2- الفاظ الزوج البذيئة
*
يعتمد على من يصاحب ..! واضح انه اعتاد على هذا السلوك منذ فترة طويلة
اخبريه عندما يريد ان يتفوه بهذه الكلمات عليه أن يخرج خارج البيت ويقولها ، أما في البيت فعليه احترامه وقولي له ( لا اريد أبني ان يتعلم هذه الالفاظ )
شغلي في البيت قرآن حتى تتعود مسامعه ، وادرسي القرآن بصوت مسموع
بأمكانك ايضا اهدائه CD قرآن للسيارة ، أو ادعية ويفضل دعاء الجوشن الصغير و دعاء الاخلاق
وأكثري من دعاء الاخلاق كل صباح ودعاء الجوشن في المساء

* عندما يتلفظ بألفاظ غير مهذبة في السيارة أمامك ، استبدلي الكلمة البذيئة بكلمة او صفه جميلة
مثال** لو قال ( ابتعد يا حيوان ) أنتي اعيدي الجملة بحيث يسمعها ( ابتعد ياجميل ، يا حلو ، يالطيف ..)
واضحكي ، خذي الأمور بمزاح

الرجال يحبون المرأة المبتسمة ، السعيدة ، الضاحكة
ويبتعدون عن الحزينة ، الشاكية ، الغاضبة ..

3- عصبية الزوج

الكثير من الزواجات تعاني من عصبية الزوج ، وأفضل حل أن لا تناقشيه وقت الغضب واتركيه حتى يهدأ
عندما يطلب منك الرد بوقتها ردي عليه عندما تهدأ سنناقش الأمر أما الآن فأنت غضبان ولا اعتقد أن المشكلة ستنحل بهذه الطريقة ..كوني هادئة تماما

سبق وذكرتي انه يزعل ويخاصم فترة طويلة ، اعتقد هذا يرجع لنمط شخصيته لا يرضى بسهوله
لا انصح أن تعتذري في حالة هو من أخطأ ، فقط عندما تكوني أنتي على خطأ .. أما اذا كان هو الذي أخطأ وزعل لا تعتذري له
اتركيه حتى يهدأ ، ثم كلميه بشكل عادي وتغاضي عن المشكلة ، واذا استمر ولم يكلمك وضحي له وجهة نظرك وان سكوته بهذه الشكل ليس حلاً..


4- مشكلة الشقة غير مريحه
*
قبل أن تطلبي تغيير الشقة ، هل بإمكان زوجك ذلك ؟
في ردك السابق قلتي أنه يدخر للعلاج ، فأيهما أهم ( العلاج ) أم ( الشقة ) ؟
بالأضافة أنك قلتي لو انتقلتي للطابق العلوي سيكون صعب عليه ، فهل بالأمكان أن تكتفي بتجديد الشقة نفسها ؟
- اخبريني ما الالوان المستخدمة في الطلاء لشقتكم ؟


5- تحملك لمسؤليات الأسرة وبعض مسؤليات الزوج
*
بما أنك قبلتي بوضع زوجك الصحي إذاً عليكِ أن تتقبلي بتحمل مسؤليات البيت ولا تعتبريه عبئ ، استمتعي وانتي تتسوقين للبيت
بعض الزواجات ما يحصل لها أن تشتري مستلزمات البيت بنفسها وتتحسر ، أليست نعمة لكِ أن تشتري بنفسك وبراحتك ؟

بالنسبة للأشياء الثقيلة لا انصح أن تحمليها فهذا غير مناسب لأنوثتك ، اطلبي من زوجك أن يستعين بأحد للمساعدة
أهتمي بأنوثتك
واعتبري نفسك المديرة للبيت ، كل شيء أنتي تنظمينه

*
امدحي زوجك ، الرجال يحبون المديح ويكرهون التذمر
اذا فعل شيء لو حمل قشة ، امدحيه بتشوفينه طاوس نافش ريشه من الوناسة
دوم كرري ( زوجي الحنون ، يخليك لي يازوجي ، رجال ولا كل الرجال ...) تذكري المسلسات السورية وكيف الزوجة تنادي زوجها ؟ طبقي

الصفة الا تتمنينها في زوجك كرريها مثل ( زوجي الرومنسي ، زوجي الللطيف ، الحنون ، الخدوم ، الكريم ..)

واشكريه على اقل شيء يسويه حتى لو كان ناقص او مو عدل ، حتى يتشجع يسوي لك
وإياك تقولين له ماسويت هذا الشي عدل ، لانه بعصب ولا بيرضى يسوي لك أي شي



6- السفر والترفيه لعدم قدرة الزوج
*
-هل السفر منحصر مع الزوج ؟؟
أنا انصحك تسافري بدونه ، وحدك ، مع أهلك مثلا ، خذي راحة من البيت والزوج
واعتبري السفر استجمام واجازة لك من كل شيء ، واستمتعي ، استمتعي ، استمتعي لأقصى حد ..
دللي نفسك بالسفر ، اذا معك زوجك ستنشغلين به ..
السفر لأراحة النفس ، استراحة من كل شيء ، استمتاع بالطبيعة والجو وكل شيء حولك
ستشعرين بمتعة السفر عندما تكوني وحدك ..

7- عدم الثقة فيه الرجوع للخيانة السابقة
تكلمنا حول هذه النقطة في البداية ، كثرة بحثك عن غرامياته يجعلك لا تثقين به
حاولي معرفة ماذا يبحث عنه بهذه العلاقات ..

8- عدم التفاهم وتقبل النقاش..
*
انصحك بكتاب ( سحابة صيف) للمؤلف كريم الشاذلي
سيساعدك الكتاب بطرق الحل للمشكلات الزوجية بشكل أفضل
وانصح بكتاب ( الرجال من المريخ والنساء من الزهرة ) لفهم تفكير كل من المرأة والرجل
كما انصح بالبحث عن (اختبار بوصلة الشخصية ) لتحليل نمط شخصية زوجك ونمطك انتي
سيسهل عليك فهم تفكيره وطرق التعامل معه ..



انتظر منكِ التطبيق واخباري بالنتائج
اهتمي بنفسك وكوني بخير
حفظك الله