نفسيتي زفت

[ام فاضل5]

سلام عليكم

مأجورين

نفسيتي تعبانه كلي هموم واحزان داخلي بركان يثور قلبي تعبان ومجروح من اهلي اني فتاة مطلقه وعندي

طفل عمرة ست سنوات اني قايمه بمسؤوليته من الصرف والبس وأكله ابوها ما يسال عنها كان قبل ما نطلق

يجي يجوف الجاهل مرة في السنه حتى ما كان يصرف على الجاهل ولا عليي لحد ما تطلقت والحين عايشه

في بيت اهلي مع ولدي حتى وإني مطلقه ما ينفق عبى الطفل لان الحين هو مسجون والطفل من غير جواز

ولا بطاقه رفعت عليه قضيه علشان يسون حق الجاهل جواز وكنت احضر كل الجلسات لحد ما جه يوم اللي

خلاني اكره روحه المحكمه وحتى الطلعه من البيت والسبب امي كانت تغلط عليي وتجرحني بكلام يعور القلب

كلام مافي ام تقولها حق بنتها مهم يكون مافي ام تدعي وتسب بنتها او ترمي كلام وسخ على بنتها وان تطعنا

بنتها في شرفها صرت اكرها روحه المحكمه والحين ما اعرف وش صار على قضيه ولدي أوقات اذا اجوف

امي جذي أتمنى من الله يرزقني بولد الحلال اللي يستر عليي ويحميني ويخاف عليي ويصوني ويحب ولدي

ويخاف عليها ويكون ليه الأب الثاني بس صعب في مجتمعنا الحالي ان الوحدة المطلقه وعندة ولد تتزوج

مرة ثانيه بس وش اسوي من ضيم اهلي اللي ما يرحم أتمنى الارض تنشق وتبلعني اهلي يخلون الواحد

يفكر بالموت وش اسوي استغفر الله هذي حالتي

[.:تقوى:.]

السلام عليكم ورحمة الله وبركاته

اختي الكريمة ، يرجى ملئ الاستمارة لتمكن من مساعدتك على أكمل وجه بإذن الله تعالى ..
مع الاجابة على الاسئلة التي تليها .

الجنس ( ذكر / أنثى ) :

العمر :

الحالة الأجتماعية ( أعزب / متزوج ) :

المستوى التعليمي ( غير متعلم/ أبتدائي/إعدادي/ثانوي/ جامعي ) :

الوضع العملي ( يعمل/يدرس/ربة بيت ) :


- كم عمر طفلك الآن ؟ وهل لديك اطفال آخرين ؟
- كم مرعلى زواجك ؟ ومنذ متى انفصلتي ؟
- كيف كان قبل زوجك يأتي مرة بالسنة لرؤية الطفل ؟ أين كان ؟
- كم مر عل سجن زوجك ؟ وما اسباب سجنه ؟
- لماذا لم يتم استخراج جواز وبطاقة للطفل منذ ولادته ؟
- ما اسباب الانفصال ؟


حفظك الله

[ام فاضل5]

الجنس : انثي

العمر : ٣٦

الحاله الاجتماعية : مطلقه

المستوة التعليمي: إعدادي

الوضع العملي: ربه بيت

عمر ولدي : ست سنوات باقي جم شهر ويدخل السبع

عندي بس ولد واحد

مر على زواجنا تقريبا ٣ أشهر

ظليت في بيت اهلي ست سنوات تقريب صار لي سنه على الانفصال لان كنت معلقه رافض الطلاق لان
كان مستفيد من ورأي حق الغلاء والسكن والشؤون

كان تاركني في بيت اهلي من غير نفق على الطفل ولا على كان في كل سنه يأتي يجوف الطفل فقط
اذا يجي يقول ابغي اجوف الطفل طبع اني ما امنع لان من حق يشوف الطفل كان تاركني في بيت اهلي
والطفل كان في بطني حامل باربعة أشهر الى ما كبر الطفل وصار عمرة ست سنوات لان كان عديم المسواليه
عديم الإحساس مر على سجن زوجي في هذي السنه قضيه سياسيه كان هو السبب في رفض استخراج
الجواز والبطاقه مجرد عناد اليي وظنه اني سوفه اهاجر بطفل أسباب الانفصال


ليس لد ولد جواز ولا بطاقه سكانيه المعروفه به بطاقه الذكيه وابوة رافض حتى ان يصرف عليه المهم باتي الى المشكله الاساسيه وهي اني كنت في الشهر الرابع من الحمل لي كنت تعبها في الحمال تعرفون المراة الحامل تصير تتنساة واجد وتعبه في الحمل قال لي زوجي روحي بيت اهلش قعدي شهر شهرين او حتى لو سنه انا ما عندي اي مانع رفضت الموضوع بس زوجي اصر عليي بعد اصرار من زوجي وافقت على الذهاب الى بيت اهلي اتصل زوجي الى امي وخبرة بسالفه امي كانت غير موافقه بس زوجي هو اللي غصب على امي وبعد الاصرار من زوجي على امي وافقت امي وقالت امي حق اخوي الكبير السالفه لكن اخوي كان مريض ما قدر واخواتي في الشغل على العلم ان زوجي لا يملك سيارة ولا ليسان المهم اتصلت امي الى ولد خالتي وقالت ليه السالفه ووافق ولد خالتي انه يجي وياخذني من بيت زوجي اتصلت امي الى زوجي وقالت ليه ان ولد خالتي بيجي ياخذني سالت امي زوجي اذا كان ما عندة مانع قال زوجي الى امي ما عندي ما نع موافق المهم قال لي زوجي خذي بعض الاغراض اللي تحتاجين ليهم وحطيهم في الحقيبه اخذ زوجي حقيبتي ونزل تحت في بيت اهله لان كنت ساكنه مع اهل زوجي في غرفه المهم وصل ولد خالتي فتح الباب زوجي وكانت ام زوجي وافقه تحت زوجي وقال زوجي حق ولد خالتي خلها تقعد في بيت اهلها شهر شهرين حتى لو سنه انا ما عندي اي مانع المهم ركبت السيارة مع ولد خالتي ورحت بيت اهلي خوات زوجي سالو زوجي وين زوجتك قال ليهم جه ولد خالته وراحت بيت ابوها من غير موافقتي يعني زوجي جذب على اهلها ما قال ليهم الصدق المهم مسامحه طولت عليكم السالفه بس وش اسوي غصب عني المهم صرت في بيت اهلي اكثر من شهر ومحد من اهل زوجي سال عني وعن سبب طلعتي من بيت زوجي وظليت في بيت اهلي لينا ما وضعت مولودي جه زوجي لي المستشفي مرتين بس وبعد جم يوم خرجت من المستشفي ورحت بيت اهلي وظليت في بيت اهلي ومحد سال عني او عن الطفل من بيت زوجي كنت اتصل الى زوجي اطلب منه بعض النقود حق اشتري بعض الاغراض حق الطفل لكن كان زوجي يرفض لينا ما كبر ولدي وصار عمرة 3 سنوات وابوة يرفض ان يصرف عليه او حتى ينفق عليي المهم بعد مرور كم شهر ذهبت الى المحكمه رفعت على زوجي قضيه نفقه حق ولدي وحقي وان يصدر حق الجاهل جواز وبطاقه ويعطيني جوازي لكن دون فائدة كنت احضر الجلاسات لكن زوجي ما يحضر ولا جلس كنت اخرج من المحكمه حزينه وبعد كم يوم عطوني المحكمه بلاغ حق الشرطه علشان يسوي جواز حق ولدي ون يدفع نفقه حقي وحق الجاهل لكن مافي فايدة حتى السجن سجنوة مادة سبوع يمكن يحس ويصرف على الجاهل ويرجع لي جوازي بس مافي فايدة وبعد جم يوم وكلت لي محامي يترافع عني ويحضر جلسات رفع المحامي علي زوجي قضيه طلبت شقه ما وفر شقه لي طلب زوجي زيارة حق الطفل بس اني رفضت والمحامي رفض لان سلوك زوجي لا تسمح ان يتحمل مسواليه طفل حتى ان يبات عندة لان زوجي اولا لوفري كل مع صبيان وثانشي ما يصلي حتى اذا بصلي يطلع ريح متعمد ولا يصوم قلت ليه صلاتك باطل جيفه تصلي وانت تطلع ريح متعمد يهوشني ويقول لي انتين صلتش العدل اقول ليه اني صلاتي احسن منك اصلي عدل حتى قلت الى امها ولدش ما يعرف يصلي ضحتك بسخريه وقالت محد نال ضرب في صغرة حق تعليم الصلاة كثر قلت ليها ان يضربونه في صغرة على تعليم الصلاة وهو ما يعرف يصلي وين اامن طفل ابو 3 سنوات عندةابغي اطلق منه طلاق خلعي بس من وين ادفع المهر كامل لان المهر صرفت على الزواج واهلي حالتهم الماديه ضعيفه واني ما اشتغل من وين اجيب ليه 1300 دينار حتى طقمي مال الخطوبه بعتها علشان اقدر اصرف على الجاهل واعلاج به الجاهل لان مسنشفي النعيم ترفض ان تعلاجه لان ما يملك بطاقه تعرفون الاوضاع واجد مشددين والحين اذا مرض اطر اعلاجه في مستشفي خاص بعد ما يصير اخلي الجاهل بدون علاج اذا مرض في اعام الماضي في عيد الاضحي جه زوجي ويه امها علشان يجوفون الجاهل ويسون ليه جواز طلب زوجي جوازي وبعض الاوراق اللي تخص ولدي والمهم بعد جم يوم اتصلت الى زوجي ردت عليي ام زوجي قلت لي زوجي ما يقدر يسوي الى الجاهل جواز لان ما عندة وقت لان يدور على شغل قلت ليه هذي كي حجه علشان ما يسوي الى الجاهل جواز خمس دقايق ما تاخذ منها عصبت ام زوجي وقالت لي ما بنسوي جواز حق الجاهل ولا بنعطيش جوازش ظليت الحين بدون جواز وولدي بعد مثل الشي ما عندة جواز ولا بطاقه وعلى العلم ان زوجي كثر المشاكل اشتغل في جيان سوة ليه مشكله وفنشوة اشتغل في ستي سنتر وسوة ليه مشكله وتفنش من الشغل وظل في البيت بدون شغل والطفل بدون جواز ولا مصروف مسامحه على تطويل الكلام

وبعد كم يوم ارسلو لي اهل زوجي ملابس في اكياس القمامه عزكم الله

مسامحه على الإملاء ضعيفه

[.:تقوى:.]

السلام عليكم ورحمة الله وبركاته

اهلا اختي ، كيف حالك ؟


عزيزتي ماعندك رجال يتواصل وياه ؟ الوالد أو اخوك ؟؟

هذي المسائل تحتاج رجال

قلتي انك رفعتي عليه قضية ، شنو صار على القضية ؟ اعتقد اذا كان حاليا سجين بمقدورك تحصلين على فرصة

الا تحتاجينه جواز سفر طليقك وبطاقته وشهادة الميلاد للطفل وعقد الزواج ، وين شهادة الميلاد ؟؟

[ام فاضل5]

ما ظل احد ما تدخل علشان يسون حق الجاهل جواز ولا فاد يعطون الاذون الصمخه

القضيه تأجلت وقلت في البدايه شنو السبب من وين احصل على بطاقه الأبو او جوازة شهادة ميلاد الطفل

عندي العقد الزواج خلاص ما يصلح لان تم الطلاق خيو تعبت من هي المساله ماليه حل اذا أهل طليقي

واقفين في صف ولدهم مستحيل احصل على جواز حق الجاهل الا بمعجزة

[.:تقوى:.]

وليش اتعبين نفسك وتعورين قلبك

ودي الولد لأهل زوجك واغراضه وقولي لهم تكفلو فيه انتو

انا ماعندي له اي اوراق ثبوتيه وكل شي عندكم ، اخذو الولد بعد ..

[ام فاضل5]

اوديه حق مين ام ابوة خلها اول تشيل روحها علشان تقدر تشيل جاهل الأبو مسجون مافي احد اخوانه

متزوجين وطالعين كل واحد في بيته حتى خواته متزوجين وكل وحدة في بيتها ولدي اصلا ما يعرفهم علشان

اوديه ليهم تعود ولدي كل في حضني ما يبتعد عني بس اذا خالاته طلعوا يطّلع وياهم لان يعرفهم انهم

بيرجعونه البيت ولا مرة في حياته خليته يبيت في بيت احد من خالاته او خيلانه لان ما يقعد بدوني وحتى

لو على قولتش وديته حق أهل ابوة ما بيرض يقعد وبيقعد يصيح وقلبي ما يستحمل اجوف ولدي يصيح

بعورني قلبي وباخذة ويايي اصلا ما اقدر على فراق ولدي هو كل حياتي ودنيتي مستحمله كلشي علشان

ولدي مستحمله الاهانات وتجريحات حتى السب والدعاوي بس علشان ولدي ساكته وصابرة لان ماعندي

مكان اروح ليه الجاء الى مين

[.:تقوى:.]

الحل بالمحكمة اختي ، واصلي متابعتك للمحكمة وإن شاء الله تنحل امورك

موفقة