مشاكل زوجية

[منال الروح]

السلام عليكم ورحمة الله وبركاته
اللهم صل على محمد وال محمد

استمارة دراسة الحالة

الجنس \انثى
العمر \26
الحالة الاجتماعيه \متزوجه
المستوى التعليمي \جامعيه
الوضع العملي \ربة منزل

المشكلة

اود استشارتكم في مشكلتي لعلي اجد الحل عندكم
انا متزوجه من سنتين وعندي الان طفل
المشكله في زوجي انه عصبي ويزعل وايد يتمسك بالراي الي يقوله هو ويسمع كلام اهله بس اما اني لا كاني ما اعرف شي في الحياه ويبى هو الي يتحكم في كل شي وني ما يكون ليي راي في أي حاجه مع اني اقول ليه الحياه مشاركه ما يصير كده بس ما يسمع كلامي
دائما يطالب بحقوقه هو اما حقوقي اني لا يعتبر حقي بس انه اكل وشرب وملبس فقط
اما هو له الحق بكل شي ومحلل لروحه كل شي يطلع وقت ما يحب يرجع وقت ما يحب هو طبعا متخذ هالكلام على انه من شرع الله ويحاججني فيه
أي كلمه اقولها لو أي نقاش رده انا ما اخالف شرع الله
طبعا هو يبى كلمته هي الي تمشي عجبني لو ما عجبني لازم تمشي واذا ما سويتها يعتبر اني عصيته ويبدي يزعل

يمنعني من زيارة بيت اهلي وقت الي هو يقرر اروح على مزاجه عيشتي وياه عيشه مذله اذا اطلب منه الشي يعاند ويقول لا عادي عنده انه يحبسني في البيت ولا اطلع وماشوف احد ولا اكلم احد عازلني عن المجتمع كله بس هو الي يسوي الي يباه حنا ما تزوجنا الا هو يعرفني اني احب الزيارات العائليه والتجمعات وبعد ما تزوجنا حرمني من هالشي بحجه انه لازم الزوجه دائما تكون في البيت ولا تطلع
حنا صارت بينا مشكله من قبل وطردني من البيت وكانت راح توصل للطلاق بس لانه اني ما بغيت اني اخرب بيتي ويضيع ولدي رجعت له ومن شروطه كانت انه ما زور بيت اهلي الا في الوقت الي هو يحدده و اني وافقت عليها توقعت بس انه راح يكون كلام وقت عصبيه وبيتراجع عن هالشي لكنه يستغل هالشي بانه يذلني ابه كل ما افتح وياه موضوع زياره بيت اهلي يقول انتي وافقتي على الشرط لازم تلتزمي ابه

هو ملتزم دينيا ويسوي اعمال و يقرا الادعيه لكن اطباعه سيئه حاولت معاه بكل الاساليب عشان انه نكون مرتاحبن في حياتنا بس هو يتصيد الاغلاط وعلى اقل شي يسوي مشكله وحتى لو هو الي غلط عليي وسوا المشكله ما يجي يعتذر لازم اني الي اروح اعتذر له والا بتصير سالفه ما تنتهي
ودخلنا الاهل في هادي المشكله لكن زاد الطين بله بدل ما تنحل تقعدت اكثر واكثر هو قاطع اهلي وني قاطعت اهله فصار ياخد ولدي بيت اهله ويمنعني اني اخده من بيت اهلي يبى دائما يكون في بيت اهله
حياتي معاه صارت نكد في نكد وبديت اكرهه وعيشتي وياه بس عشان اولادي لا اضيع بينا اذا صار طلاق
فكل الي اباه منكم ارشادي للطريقه الصحيحه الي اتعامل وياه عشان يغير من اطباعه واساليبه
لاني تعبت منه نفسيا ومن التفكير في اني ادور اكثر من حل عشان اغيره الاطباع

[.:تقوى:.]

السلام عليكم ورحمة الله تعالى وبركاته
اهلا بكِ اختي الكريمة ، شكرا لطرح مشكلتك ولثقتك بنا
كيف حالك ؟ اتمنى تكوني بخير وعافية ..

عزيزتي اذا هو طردك من البيت شلون ترجعين بشروطه هو ؟!!!!

المفروض انتي الا تحطين شروط لرجوعك ! انتي عطيتيه الحرية والسلطة الكامله يتحكم فيك بكيفه ..!

لا تناقشينه ولا تعاندينه ولا تعارضين رايه ، كل شي يقوله قولي صح وامدحيه وبيني له ان هو عقلة كبير وحكيم ودايما امدحيه بأي صفه انتي ودك تكون فيه حتى لو كانت مو موجوده فيه .. بلاقيه راضي عنك وبكون اكثر هدوء ..

بالنسبة لأهله زوريهم وحبيهم ، وبيني له ان اهله هم اهلك واشتري لهم هدايا واذا طبختي شي عطيه يوديه لهم

واستغلي لما تروحين السوق بتشترين لأهله شي وهدايا وغيره تشترين لنفسك وقولي له ابغي اهلك والناس يشوفون خيرك واضح علي

وانك مو مقصر علي بحاجة ومدللني ومغرقني بخيرك ..


بعض الامور اختي لا يصلح معها النقاش ، بعض الأمور لا تؤخذ الا بالحيله ..


اهتمي بنفسك
حفظك الله