مساعده من الاخت تقوى

[عاشقة الخضر]

السلام عليكم اختي
اللهم صل على محمد وآل محمد

عزيزتي تقوى كيف حالك؟

استمارة دراسة الحالة

الجنس :انثى
المستوى التعليمي:ثانوي
العمر:25
عمر الزوج:30
عمر اختي :19
الحاله الاجتماعيه:متزوجه من سنتين
العمل:ربة منزل

المشكلة بالتفصيل

اختي عندي مشكله وحابه اخذ رايك فيها وهي زوجي احس قل اعجابه فيني اي احد ينعجب فيه بس انا لا بقولج قصه صارت لي مره كنا في محل انا واهو واهلي ومن ضمن اهلي عندي اخت اصغر مني بست سنوات شبه منفصله جات اختي جنبي وقالت لي اخذي هاللعبه وكان جنبي زوجي كانت تمزح معاي قلت لها مابيها قال زوجي لها اذا انتي تبينها خذيها قالت له مابيها بس امزح وانا كنت طول الوقت متنرفزه من حركته لانه مو اول مره يعرض عليها شي تشتريه من فلوسه وكله حجته انه يعتبرها مثل اخته وكل مارحنا سوق قالي اشتري حق اختج شي واذا مايبي ينرفزني يقول اخذي حق خواتج شي واحيانا كله يسألني اخبار اختج

ومره صار لما سافرنا كنا مسافرين مع اهلي كلهم عطاني شنطتي وقالي حمليها وراح اخذ شنطة خواتي علشان يحملها عنهم ومره صار بعد بنفس السفره كنا بنطوف حول الكعبه رحنا بنقبل الكعبه كان اهو وراي علشان يحميني من الرجال لا احد يكزني او يلمسني فجأه تخيلي تركني وراح يحمي اختي قدام ايش تفسرين حركاته هل انا شكاكه وشكي ماله داعي ولا ايش؟ ودايماً يقولي انتي حساسه وغيوره من اختج انا مو حساسه بس تصرفاته تنرفزني حيل ومره كنت شايله اكياس يلتفت على اختي ويقولها عطيني احمل اكياسج مع ان اخوي وابوي موجودين يعني فيهم يشيلون اكياسها ليه اهو دايماً بالوجه ويشيل ويعطي

ولما واجهته وقلت له حركاتك ماتعجبني يقول انتي غيوره واختج مثل اختي انتي ليش ماتقتنعين بهالشي واقوله ليش ماتتصرف هالتصرف مع خواتي الثانيين شمعنى اهي يقول لانها تشبه اختي فلانه بتصرفاتها فعلشان كذا احس اني متقبلها كأخت لي وانا اسوي كل هذا لاني اعتبرها مثل اختي ، عزيزتي حتى لو ايش ماكان مايعاملها مثلي انا تعبت منه احس تصرفاته تنم عن اعجاب مو سالفة اخوه

انتي ايش رايج بهالموضوع هل انا ابالغ من غيرتي ولا معاي حق وايش الاشيا الي اسويها علشان اجذب انتباهه لي
دايم يومه عالجوال وكله مشغول ماعاد فيه اهتمام لي اوك يطلعني يوديني الطبيب بس هالاشيا ماحس فيها انه معجب فيني ومهتم شخصيته شمالي غربي حللت شخصيته ..

[.:تقوى:.]

السلام عليكم ورحمة الله وبركاته
اهلا بكِ اختي الكريمة ، شكرا لطرح مشكلتك ولثقتك بنا
كيف حالك ؟ اتمنى تكوني بخير وعافية يارب
اعتذر لتأخري بالرد بسبب مرض والدتي ..


لا تركزين على زوجك وتصرفاته تجاه اختك ، واذا انتي حاسه انه قل اعجابه بك شوفي نفسك

غيري ستايلك ، اهتمي بنفسك وتزيني ، تدللي عليه ، ودلليه ..

حاولي ان تبعدين زوجك عن اماكن تواجد اختك ، اذا انتي حاسه فيه شي ، لكن لاتكررين عليه السالفة حتى لو كانت مو في بالة انتي بتخلينها في بالة

بكرة لاتقولين زوجي تزوج عليَ او خاني !! انتبهي ..


حفظك الله

[عاشقة الخضر]

السلام عليكم
كيف حالك اختي
انا احس اني مدللته بزياده وودي اخفف من هالشي ومو عارفه كيف المفروض لا إفراط ولا تفريط بس ما اعرف كيف وودي اكون انسانه عصاميه وانسانه تفكر بنفسها وبس وودي اكون انسانه مهمه وماعرف كيف انا وحده عندي هوايات وكل ماقلت ببدأ امارسهم اتملل وما اكمل انا طبعاً كاتبه مبتدئه واحاول اطور من نفسي بس ماعندي إراده من كثر التحطيم من الي حولي ما أحس اتحمس واطور من ذاتي وودي اكون شخصيه مهمه لنفسي وذاتي اولا بعدين التفت على زوجي احس شخصيته شغله اولاً بعدين انا وانا ابي اصير مثله اهتم بنفسي اولاً بعدين اهتم فيه اهو بس ماعرف كيف ابدأ ماعرف اشجع نفسي بنفسي ابي إراده واحس الإراده صعبه كيف اكتسبها

[.:تقوى:.]

وعليكم السلام والرحمة

ماهي اهتماماتك وهواياتك ؟ منها ابدأي ..

ابحث عن اماكن تمارسين فيه هواياتك ونميها ، انضمي لمؤسسات خيرية ، او المأتم في منطقتك

او اماكن مخصصة للأنشطة الصيفية للأطفال ، شاركيهم ، قدمي خدمات مساعدة وتقديم دروس ودورات في مجال تبدعين فيه انتي

هناك افكار كثيرة تجدينها في شبكة الانترنت ، كل ماعليك هو البحث ..

حفظك الله