مشكلتي مع خطيبي

[عاشقة الخضر]

اللهم صل على محمد وآل محمد
السلام عليكم ورحمة الله وبركاته

كيف حالك اختي تقوى ؟

اختي عندي مشكله مع خطيبي ورح اقولك عليها بالتفصيل
انا من ثلاث شهور اكلم خطيبي بس من ثلاث شهور كلام كتابي مو صوتي يعني اكلمه بالواتساب لان مابينا شي رسمي للحين مشكلتي ان الي خاطبني ولد عمي المشكله انه كان على علاقه مع بنت عمته بالماضي وهذي العلاقه تعدت سالفة الخطبه يعني خطبها وكل شي بس انهم انفصلو عن بعض لان تفكيرها وحياتها غير عن تفكيره وحياته وعلاقتهم في بعض ظلت سنه يعني (بينه وبين بنت عمته )(للمعلوميه ان عمته ماتقرب لنا لان عمته من ابوه ) المهم إذا احد جاب طاري خطيبته السابقه يعتفس وينقلب مزاجه وإذا قلت له انساها يقول ابي انساها بس ما أقدر وإذا قلت له انت تحبها ؟ يقول لا ماحبها يمكن انه يكابر مادري عنه بس انا تعبت منه مو عارفه افهمه يبي يكمل معاي بس اتنرفز من حركاته لان احس انه متعلق في بنت عمته حتى إذا حبيت اني اكون الاولى والاخيره في حياته احاول اساعده بأي شي بس مو عارفه كيف اتصرف معاه وشلون اسلوبي يصير معاه إذا عصب شلون اكلمه ؟ ولا لا ؟ مو عارفه اواسيه لازعل ايش الكلمات الي اقولها له لازعل ولاعصب للمعلوميه انه يقول لي كل شي عن حياته وكل شي يقوله لي حتى قال لي انتي اول وحده ارتاح لها إذا كلمتها حتى سالفته مع بنت عمته قالها لي عنها بس انا مو راضيه اتحمله احس ان عقله تشغله بنت غيري وانا هالشي مابيه


رح اقولك معلومات عني
انا عمري 23سنه وخطيبي عمره 27 سنه
درست سنتين بالجامعه وطلعت بسبب تحملي للمواد وطلعت وخطيبي درس جامعه بس سنه وحده
اقرب شخص لي صديقتي
خطيبي مو قريب حيل من خواته خاصة انه كان عايش بره طول حياته بس سنه عاشها هنا واهي هذي السنه طول حياته عاش في إيران من انولد
وماعنده اصدقاء هنا ولاكون له اصدقاء يمكن اقرب شخص وكل شي يقوله له لي واخوه حتى العلاقه الي دارت بينه وبين بنت عمته قالها عليها بس انا متعلقه فيه واحبه بس خلاص طفشت منه يجرحني بطاري خطيبته السابقه ومو عارفه كيف اخليه ينساها

وبس ياليت تعطيني حلول واساليب اتبعها مع خطيبي اكلمه إذا عصب ولا اتركه ؟
شنو الحل علشان ينسى خطيبته السابقه ؟ (للمعلوميه كان يطلع معها ويتبادلون الهدايا وعايشين لحظات الخطوبه بالطول والعرض وراسمين حياتهم المستقبليه بالقلم والمسطره بس اسلوب حياتها ماعجبته فعلشان كذا تركها يقول انا ابوي رجل دين وشيخ واهي تبي تعيش حياه مرهفه ومافي شي حرام عندها وكذا واهي الحين بعد انفصالهم انخطبت وراحت في طريقها بس الحين المشكله عندي انا يقول لي مو قادر اثق في بنت من بعدها قلت له مو كل اصابعك سوا ومو كل البنات نفس بعض قال ادري بس مو قادر انساها ومو قادر اثق في بنت من بعدها انا اكلمه بالساعات يعني اربع خمس ساعات متواصله عادي اكلمه بالدوام اكلمه بالبيت اكلمه بكل مكان اهو ينبسط معاي إذا كلمته بس اتنرفز منه لاجاب طاري خطيبته السابقه الي موراضي يثق في بنت ثانيه من بعدها يقول مابي اثق في اي بنت بعدين لاتعلقت فيها تتركني خلاص مليت منه

شنو تشورين علي انفصل عنه ؟ واتركه دام مافي شي رسمي بينا حاليا ؟
ولا اتبع معه اسلوب ثاني ؟

ويعطيك العافيه

[عاشقة الخضر]

بطاقة تعريف عني
الجنس :انثى
العمر :23
المرحله الدراسيه : ما أدرس درست سنتين بعدين طلعت
المرحله الاجتماعيه : مخطوبه
وما أشتغل جالسه بالبيت
ويعطيكم العافيه

[.:تقوى:.]

وعليكم السلام والرحمة
اهلا بكِ اختي الكريمة ، شكرا لطرح مشكلتك ولثقتك بنا
كيف حال ؟


عزيزتي بما انه يتواصل معك ويخبرك بكل شيء فهذا يعني انه مرتاح معك

وبما انه مرتاح إذا هو يحبك ..


لا تلحي على موضوع خطيبته السابقة وتجاهلي تغير مزاجه كلما ذكرت

فهو يحتاج لوقت ليتغلب على ذكرياته معها ..


اهتمي بنفسك واهتمي به ، ودلليه ولا تظهري الا الجميل منكِ أمامه

وكوني انسانة مميزة وممتعة يشعر بالشوق لها اذا غابت ويستأنس اذا حضرت


فالطفل عندما يحرم من لعبته المفضلة ، يجب ان تعطيه بديل لتلك اللعبة حتى ينساها

كلما انشغل زوجك في امور الحياة والعمل والاسرة وبكِ انتي ، مع الوقت سينساها فلا تدققي بهذه المسألة معه

كي لا تذكريه بها في وقت وحين ..


وعندما ترينه غاضب ومنزعج اتركيه ليهدأ لوحده ، ولا تكلميه بالموضوع الا إذا هو تكلم فيه


انصحكِ بقراءة كتاب

- سحابة صيف للكاتب كريم الشاذلي

- لغات الحب لكريم الشاذلي



حفظك الله

[عاشقة الخضر]

السلام عليكم ورحمة الله وبركاته
اللهم صل على محمد وآل محمد
احوالك أختي تقوى ؟
ابي اقولك عن جديدي وأخذ مشورتك في بعض الامور
ولد عمي خطبني رسمي وتمت الامور على خير وبدأ بيننا الكلام صوت يعني الو وقت يكون مروق مافي مثله يطيرني فوق وما أمل منه ابد بس وقت يكون معصب اتنرفز منه حيل ومابي أكمل معه المحادثه وابي اسكر منه بسرعه مثلا هاليومين مراقبني حيل من ناحية النوم مايحب السهر ابد وانا بطبيعتي جالسه بالبيت لاشغله ولا مشغله ولا في شي شاغلني اسهر الليل اصلي الصبح وانام اهو مايحب اني اسهر وإذا سهرت لازم اكون سهرانه معه يعني على الجوال او الواتساب اهم شي اكون معه ومايحاسبني على السهر بس لاسهرت لحالي يعصب ويقولي انتي ماتسمعين الكلام ولاتطيعين كلامي ودي اتخانق معه بس ماحب اكبر المواضيع يمكن ان يكون هالسبب تافه بس من جد ماعرف له وقت يعصب ايش اقوله وماحب اكلمه ماودي اسولف معه واجد واهو يبيني طول اليوم وحتى واهو بالدوام يبيني اكون معه على الخط واسولف معه خلصت السوالف مابقى شي نتناقش فيه إذا ماكلمته يزعل يقول ليه ماتسألين عني وإذا سألت لازم اسولف معه غير السؤال عن احواله صدقيني اخت تقوى مو عارفه له عنيد حيل والي يبي يسويه يسويه ماقدر اوقف في وجهه ايش تنصحيني اسويه معاه من ناحية مراقبته لي بالسهر والسوالف الي مايبيها تنتهي بيني وبينه

اما بخصوص الكتب الي نصحتيني فيهم دورتهم بالمكتبه الكبيره وماحصلتهم ان شاء الله القاهم المره الجايه

ويعطيك العافيه

[.:تقوى:.]

وعليكم السلام والرحمة
اهلا عزيزتي ، كيف حالك ؟

هذا طبيعي أن يتعلق بك ويطلب التواصل الدائم معك .. كونك امرأة تدخل حياته ( زوجته )

هو يشتاق والأفضل التعجيل بعقد القرآن ..

لستي مضطرة لأخباره بكل شيء تفعلينه مثل متى تنامين ومتى تستيقظين !

اخبريه بما تريدينه ان يعرفه فقط ، أم الأمور الأخرى اتركيه يعرفه بعد العقد

الكتب تجدينها بالنت ، ليست متواجدة بأي مكتبة ابحثي عن دار النشر التي تنشر الكتب هذه لتعرفي مكان بيعها


حفظك الله

[عاشقة الخضر]

اللهم صل على محمد وآل محمد
السلام عليكم ورحمة الله وبركاته
اختي تقوى كيف حالك
رجعت لك بعد غيبه ورح اقولك بأخباري
بصراحه انا مع خطيبي كويسين ووضعنا حلو وعقد قراني ان شاء الله بيصير في شهر شعبان بس في شغلات تصير لي وياه مثل انه عصبي حيل وإذا جا يسألني عن شي يسوي لي تحقيق متى وليش وايش تحقيق مايكتفي بالي اقوله اياه يبي مني تفصيل وانا حيل اتضايق من اسلوبه لأن اسلوب تحقيق مو اسلوب سؤال عادي حيل اتضايق منه اقوله غير اسلوبك مو مشكله اجاوبك بس مو بأسلوب التحقيق قام عصب مني وقال لي انا ما احقق وياك انا اسألك بس ولازم انا اتنازل عن تصرفه علشان اخليه راضي مو عارفه اتصرف معاه حتى لما استشير امي في هالموضوع تقولي ميخالف الرجال هالايام كلهم كذا يزعلون من اقل تصرف مابي اداريه على كل غلط.يسويه لي مابي ارضى على كل عصبيته مابي اسكت واخليه اهو الي على حق ابي اتصرف وياه بأسلوب يقتنع فيه من غير عصبيه ومن غير ما اتنازل له عن رغبتي في شي بس علشان ارضيه قولي لي ايش اسوي في هالحاله؟

[.:تقوى:.]

وعليكم السلام والرحمة
الحمدلله بخير ، كيف حالك انتي ؟

والدتك محقه ، هذا في بداية الخطوبة أمر عادي فهو يريد معرفة كل التفاصيل الخاصة بك

مع الوقت لن يسألك ، تغاضي عن بعض الأمور فلا يوجد رجل بلا عيوب كما لايوجد امرأه بلا عيوب

وكما نصحتك أبحثي عن الكتب التي اشرت لك بها في ردي السابق وستفيدك كثيرا

حفظك الله