مشكلة

[همسات الزهراء]

بسم الله الرحمن الرحيم
اللهم صل على محمد وآل محمد الطيبين الطاهرين
السلام عليكم ورحمة الله وبركاته

الجنس : أنثى
العمر : 20
الحالة الأجتماعية : عزبا
المستوى التعليمي : جامعية
الوضع العملي : ادرس

المشكلة بالتفصيل :
مشكلتي مع أختي , يا اخت تقوى أختي تكبرني بـ 6 سنوات , من قبل علاقتنا مع بعض حلوة و علاقة اخت باختها
وحتى كنت اقول انها أحسن وحدة و اطيب وحدة في خواتي
هي لمن تخرجت من المدرسة ماكملت دراستها قالت انها تبي تنتظرني عشان ندرس مع بعض

لكن فجأة الله قلب الحال وتغيرت صورتها بعيوني : صارت بنظري انسانة حاقدة و لامبالية و ثقيلة دم و ما أحب تتكلم وياي , اذا جت تتكلم وياي أقولها بسرعة بسرعة ( عشان تخلص كلامها ) واذا تكلمت انا ما اهتم لحديثها و يكون بالي وتركيزي في شي ثاني .
وما احب انها تقرب من اغراضي كللش , مثلا ماحب تفتح كبتي وتاخذ شي منه , ماحب تفتح دولاب اغراضي وتستخدم منه شي
حتى معجون الاسنان صرت اشيله من الحمام وانتو بكرامة عشان لاتستخدمه < لأنه حقيقة اهي مريضه بامراض في الدم معديه ومابي يصير لي شي الله يحفظنا ويحفظكم ان شاء الله

انا علاقتي بالبنات أفضل بواجد بعلاقتي فيها , انا أمزح واضحك مع البنات و اتقبل مزحهم , بس هي لأ !

انا شوفي يا أخت تقوى , انا ماحب شخصيتها كلش لأنها اذا بتتكلم تتكلم على البنات وفلانة وفلان ( انا ماحب اتكلم على احد ولا احب اسمع احد يتكلم عن شخص ثاني ) , وهي جدا جدا مهملة , انا كم مرة انظف الغرفة و ارتبها وهي تجي بالراحة تعفسها فوق تحت ! ( مشكلتها كبيرة مو طفلة عشان اتغاظى !! )

استغفر الله ماحب ألمس شيء هي تلمسه , مثلا لو ناكل شيء وهي قربت من جهتي مثلا > أقول شبعت الحمدلله و أقوم
و ألحين صايرة مادري كيف , اذا أقول لها كذا وكذا يبي لها سنة على ماتستوعب الشي و تقهرني و أقول ليها : أنتين مادري ويش في عقلش , تعالجي عنه ~ تصرفاتش كلش مو مسؤولة عنها !! < ألحين هونت انا عن هالكلام لأنه أقول يمكن من الامراض اللي فيها !

تمر فترات انا اظل طول اليوم ساكته عنها وكلماتي معدودة ! ما اتكلم الا اذا هي تكلمت وغالبا أرد عليها بالحركات > إي و لأ

أختي تكفي ساعديني بهالمشكلة
شكرا مقدما
السلام .

[.:تقوى:.]

وعليكم السلام والرحمة
اهلا بك اختي الكريمة ، شكرا لطرح مشكلتك ولثقتك بنا
كيف حالك ؟ اتمنى تكوني بخير وعافية يارب ..

انتي تكرهين بعض السلوكيات من اختك وليس اختك

حاولي التفريق بين السلوك والفرد ..


إذا كنتي تتضايقين من بعض سلوكياتها ، اكتبي هذه السلوكيات على ورقة

واجلسي معها بكل حب وود واخبريها انك لا تحبين هذه السلوكيات وانها تضايقك

عبري لها عن حبك لها وانك لا تريدين ان تخسريها فهي اختك المقربة بسبب سلوكيات بأمكانها ان تصححها

وان بمقدورك مساعدتها في التخلص من هذه السلوكيات السلبية وتعزيز السلوكيات الايجابية ..


اهتمي بنفسك وكني بخير
حفظك الله

[همسات الزهراء]

بسم الله الرحمن الرحيم
اللهم صل على محمد وآل محمد الطيبين الطاهرين
السلام عليكم ورحمة الله وبركاته
....
اهلا وسهلا أختي انا الحمدلله بخير عساش بخير يارب

كتبت لها تقريبا اغلب الامور اللي تضايقني فيها ولمن جيت اقراهم ~ كنها مو مبالية ! و قامت تضحك و جذي >_>!!!
و بعدين قالت لي تبي الورق عشان تطالع فيهم و تقراهم ~ عطيتها انا .. أتمنى انها تتغير يارب و تتوقف عن هالتصرفات اللي تعصر قلبي ><"
لنه بجد مابي اعيش بضغط نفسي و ضغط لختبارات والدراسة ~ مابي شيء يأثر على شكلي و يكبرني بسرعة وانا بعدني صغيرة

انا بالنهاية قلت لها : اتمنى تتغيري لأنه بجد تعبت منش ومن تصرفاتش ومن لختبارات

دعواتش أختي ~ و شكرا ي الغالية على وقوفش وياي =)

السلام ..

[همسات الزهراء]

السلام عليكم أختي تقوى
..
انا كتبت لأختي آلاف النقاط اللي كنت اقول عنها تضايقني
و اختي بالبداية كانت تحاول تتحسن وياي ~ وليلحين انا ملاحظة انها متغيرة بس في نقطة واحدة !

~
بعد التفكير يا أخت تقوى ’’ انا افكر يمكن انا اللي يبي لي اتغير مع أختي اللي أكبر مني
انا اللي يبي لي احترمها و اقدرها و اتحمل تصرفاتها ~ وكان الواجب عليج أختي انج تنصحيني بإن اعاملها كأخت , وكان منج تنصحيني ان عادي و مافيها شيء لو الخوات تشاركوا بنفس الاغراض و مو مشكلة لو اختي فتحت ادراجي و كبتي عشان انها تبي شيء منهم!

...
خلاصة قولي :: انا ابي اغير معاملتي لأختي
بحيث اعاملها و اتحملها كـ [ أخـت ] بمعنى الكلمة


موفقين ان شاء الله